Mjeku Ilir Alimehmeti, njëherazi ish-kandidati i Primareve të PD për Bashkinë e Tiranës, ishte i ftuar në “Intervistë me Merita Haklaj” në “A2CNN”, ku foli mbi garën e tij në zgjedhjet brenda PD, të cilat do të caktonin emrin zyrtar të opozitës për kryetarin e ri të Bashkisë së Tiranës.
Alimehmeti u shpreh se kjo ishte një eksperiencë shumë e bukur për të, ndërsa e cilësoi si një formë matëse se sa ishte dëshira e ndryshimit brenda PD. Ai i uroi suksese kandidatit tjetër me të cilin doli në balotazh, Belind Këlliçi, i cili pas tërheqjes së Alimehmetit nga gara, është në këtë mënyrë kandidati zyrtar i Partisë Demokratike për kryetarin e Bashkisë së Tiranës, që do të garojë përballë kryetarit aktual, Erion Veliaj.
“Për mua personalisht ka qenë një eksperiencë shumë e bukur. Kjo garë ishte një formë matëse se sa ishte ajo dëshira e ndryshimit brenda Partisë Demokratike. Në vetvete kandidatët do duhet të merret me platformat, do duhet të merren me menaxhimin dhe nuk mund të harxhojnë kohën me regjistrime njerëzish.
Unë e kam shumë të qartë se kush është mbështetja ime jashtë, sigurisht jashtë strukturave partiake. Ndërkohë që brenda partisë, ka një diferencë, sepse kemi këtu njerëz që janë më të lidhur njëri me tjetrin dhe të dish peshën specifike se sa e ke aty, nuk mund ta bësh ndryshe se sa të hysh në garë dhe ta shohësh.
Sa i përket përballjes me z. Këlliçi, i uroj suksese dhe një punë sa më të mbarë deri në zgjedhje, mes nesh kishte një balotazh që mund ta quajmë “matematikor”, mirëpo nuk ishte një balotazh poltiik, pasi nga pikëpamja politika këtu dukej qartë ajo që foli anëtarësia. Pra, distanca ishte ajo që ishte.”
Ilir Alimehmeti deklaroi se vendimi për tërheqjen nga gara erdhi për disa arsye, ndërsa më kryesoren e cilësoi faktin se bërja e zgjedhjeve të tjera, 5 ditë pas atyre që u bënë, do ta angazhonte tej mase strukturën, ndërsa kjo sipas tij ishte më mirë të shmangej për vetë faktin se, rezultati ishte tepër i qartë që në fillim për epërsinë e Këlliçit.
“Nga ana tjetër sigurisht që ne kemi edhe këshillimet tona, brenda dhe jashtë partisë, dhe të gjitha këto këshillime grupohen në të dhënat numerike që kishim më përpara dhe në fund fare të çon në një konkluzion të caktuar.
Në rast balotazhi, do të involvohej një strukturë e tërë, do të lodhej, ndërkohë që, rezultati do të ishte i qartë, do fliste shumë qartë në favor të z. Këlliçi, sepse pothuajse kaloi që në raundin e parë. E në këtë rast nuk do të bënte sens një tejlodhje e strukturës.
Edhe zhgënjime patjetër që pati, por me këtë rast dua të bëj një apel: Demokracia nuk funksionon nga shtëpia, nga kafja apo nga rruga. Ajo funksionon nga kutia e votimit.
Nëse vendosim ta mbajmë veten larg kësaj forme demokracie që është votimi, në atë moment ne e kemi hequr nga vetja jonë forcën e vendimmarrjes.”
