Pasditja e 5 dhjetorit, kohë kur nisi të ndërtohej perimetri i sigurisë nga Policia e Shtetit në kuadër të masave të marra për të ruajtur sigurinë e liderëve të BE që do të merrnin pjesë të nesërmen në Samitin BE-Ballkani Perëndimor, nuk ka qenë aspak e qetë në Tiranë.
Sipas raportimit të mediave vetëm në paraditen e 6 dhjetorit ka pasur tension në radhët e uniformave blu pasi një “Land Rover” i kamufluar me fenelina policie kishte thyer perimetrin e sigurisë dhe më pas ishte zhdukur në periferi të Tiranës pas ndjekjes nga policia.
Lajmi u mohua më pas nga drejtori i Përgjithshëm, Muhamet Rrumbullaku, por gjatë një interviste për emisionin “Zona Zero”, eksperti i sigurisë Ervin Karamuço tha se incidenti ka ndodhur vërtet në mbrëmjen e 5 dhjetorit.
“Ajo u mbajt sekret për të mos prishur dhe imazhin e asaj pune të mirë. U bashkëpunua shumë mirë me organet e tjera si EuroPol dhe Interpol, si dhe me autoritet vendase të inteligjencës. Por, duhet të ndalonin edhe ngjarjen që ndodhi tjetër me sulmin ndaj Berishës. Sepse ka cenim të sigurisë publike nëse ata cënohen”, tha Karamuço.
Sipas profesorit të kriminalistikë, Rrumbullaku e mohon këtë sepse nuk dëshiron të prishë imazhin e policies e madje ekziston një mesazh që iu është shpërndarë të gjithë efektivëve të Policisë për të ndalur një “Land Rover” me fenelina.
“Ajo ka ndodhur atë dite, por të nesërmen është dhënë nga disa portale. Unë kam patur në celularin tim një mesazh që iu bëhet thirrje të gjithë policisë ku nëse shihni një “Land Rover” me fenelina ndaloheni menjëherë se ka thyer perimetrin e sigurisë. Ai nuk është kapur edhe sot”, zbuloi Karamuço.
