Tirana është një nga gjashtë bashkitë ku procesi i Primareve do të finalizohet me raund të dytë, pasi asnjë nga kandidatët nuk ka mundur të kalojë pragun 50% të votave.
Në balotazh për kryeqytetin kanë shkuar Belind Këlliçi, i cili ka marrë 4040 vota dhe mjeku Ilir Alimehmeti me 2196 vota. I treti më i votuar nga demokratët e Tiranës ishte ish-deputeti Gerti Bogdani me 1819 vota.
Sakaq, pas përfundimit të procesit dhe ecurisë model të tij për bashkinë e Tiranës, ka reaguar edhe kandidati favorit.
Këlliçi me një postim në Facebook, falënderon të gjithë ata që i besuan me votë dhe konfirmon betejën me Alimehmetin në 11 dhjetor, me raundin e dytë të Primareve.
Ai shton se ka për qëllim të bindë çdo demokrat se ky proces është garancia më e madhe që opozita të ketë kandidatin e saj më të fortë në zgjedhjet lokale të 14 majit për të synuar që të mposhtë Erion Veliajn.
POSTIMI I PLOTË:
Po e nis me një falënderim. Faleminderit juve, që me shiun litar dhe në një ditë pushimi me familjen, dedikuat kohën tuaj për Primaret e Tiranës! Për thuajse një muaj, dyert tuaja ka qenë hapur për ne kandidatët. Për të na dëgjuar çdo fjalë, edhe kur emocionet nuk na kanë lejuar të shprehemi më mirë. Personalisht jam përpjekur të gjej kohë për të takuar çdokënd, sepse për të fituar duhet të dëgjosh.
Kur vjen radha për të folur, unë zgjedh të flas me votë. Ky është karakteri im. Rezultati e tregon më mirë se fjalët e mia. Gara kërkonte që në 7 kandidatë, një prej tyre të merrte më shumë se gjysma e totalit të votave. Me mbështetjen tuaj arrita në 48%.
Ky është një mesazh inkurajues për të mos e ndalur punën. Do të shkojmë në raundin e dytë, për të bindur çdo demokrat se ky proces është garancia më e madhe që opozita të ketë kandidatin e saj më të fortë në betejën e Majit. Do të punoj orë pas ore për çdo votë demokrati, për t’ju përfaqësuar me nder në përballjen e madhe të 14 majit. Ju falënderoj për të gjithë mbështetjen tuaj të pakursyer!
E di se nuk mjaftojnë fjalët, prandaj do të flas sërish me votë, më 11 dhjetor. Faleminderit që më vlerësuat! Primare të papara! Energji e jashtëzakonshme demokratësh! Respekt për të gjithë, sidomos për të 6 kandidatët e tjerë në këtë proces! Jemi bashkë. Demokratë e simpatizantë, vazhdojmë së bashku.
