Mjeku i njohur epidemiolog Ilir Alimehmeti ka qenë i pari nga shtatë kandidatët në garën për Bashkinë e Tiranës që ka votuar në Primaret e Partisë Demokratike.
Alimehmeti ka votuar në qendrën e votimit që është ngritur në selinë qëndrore të PD, duke dhënë edhe një prononcim të shkurtër për mediat.
“Në listë jam kandidati i gjashtë, të gjithë listat janë bërë të mundura me email. I kanë shkuar të gjithë kandeidatëve në formë zyrtare në afatet e përcaktuar. Të gjitha janë të dhëna. Jo të gjithë simpatizantët mund të vijnë për të votuar, por numri është i madh. Ne e kemi të qartë listën e votuesve nga fillimi në fund, shifrat mund t’i merrni te komisioni. Fushata ka qenë pozitive, s’ka pasur incidente. Situata të vogla që zgjidhen në mënyrë të thjeshtë. Të gjitha janë zgjedhur sipas modaliteteve dhe afateve”, tha Alimehmeti.
Ai u shpreh se nuk janë regjistruar parregullsi deri më tani, ndërsa ftoi simpatizantët që t’u drejtohen qendrave të votimit për të dhënë verdiktin e tyre në këtë proces demokratik brenda PD.
“Sot qytetarët e Tiranës vendosin për Tiranën. Për herë të parë i kthehet sovraniteti i votës qytetarëve. Sot keni të drejtën ju të votoni për familjen tuaj dhe komunitetin tuaj. Ju ftoj të vini masivisht për të votuar në një garë që ndodh për herë të parë në Ballkan. Fushata ka qenë shumë pozitive, flasim këtu për Bashkinë e Tiranës. Nuk ka pasur incidente. Situata të vogla që zgjidhen në mënyrë të thjeshtë”, ishte mesazhi i Alimehmetit.
Mjeku i njohur ka përballë 6 kandidatë në këto zgjedhje brenda PD-së, ku dy rivalët më në zë janë deputeti Belind Këlliçi dhe ish-ligjvënësi Gerti Bogdani.
