IKMT ka njoftuar se ditën e sotme do të bëhet shpërthim i kontrolluar i Prestige Resort.
Forcat xheniere kanë hapur 730 furnela ku do të montohen 70 kg lëndë shpërthyese si dhe dhe 4 mijë metër linear fitil për të bërë të mundur rrëzimin në tokë të objektit 7 katësh.
Dallëndyshe Biçi e IKMT-së nuk pret që nesër të shprehej Gjykata Administrative e Durrësit, pas kërkesës së avokatëve të Prestige Resort për të pezulluar shembjen, por ka dhënë urdhër të prerë që në orën 15:00 të hidhet në erë hoteli.
Në lidhje me këtë vendim, foli në konferencën e sotme për mediat edhe kryeministri Edi Rama, i cili e ka firmosur vetë lejen për ngritjen e hotelit disa vite më parë.
Sipas Ramës në aksionin e IKMT-së janë ndjekur të gjitha procedurat ligjore, ndërsa theksoi se ky është vetëm fillimi dhe se qeveria do të vazhdojë operacionin kundër ndërtimeve pa leje në bregdet.
“Të gjithë të barabartë përpara ligjit, nuk do të ketë asnjë tolerim”, u shpreh kryeministri.
“Është shumë e rëndësishme që kur gjykojmë të shikojmë sesi funksionon në aspektin ligj një proces i tillë. Iu siguroj që ligjërisht janë ndjekur të gjithë hapat ligjorë. Po flasim për përfitime të mëdha, në këtë operacion u paragjykua dhe u përqesh, janë marrë 15 vendime konfiskimesh. Po të shikoni ligjin që është bërë enkas për këtë punë, është shumë i qartë. Mjafton që të lexohet ai ligj. Tjetër është kur dikush ka dalë nga leja e ndërtimit, tjetër është kur dikush ka dalë më shumë sesa kaq. Për rastin në fjalë do të vazhdojë deri në fund. Në dijeninë time do të ketë edhe shembje të tjera. Nuk do të ketë asnjë lloj individi që do të tolerohet. Urdhëroni jeni të gjithë të denonconi nëse ka raste të tjera. Të tjera raste po evidentohen. Do nxjerrim mësim edhe ne, se nuk i kemi ditur të gjitha. Nuk ka lidhje me lirinë e medias“, shtoi Rama.
NJOFTIMI I IKMT:
IKMT prish me shpërthim të kontrolluar objektin 7-katësh në vijën bregdetare të Kavajës.
Inspektorati Kombëtar i Mbrojtjes së Territorit në bashkëpunim me forcat e Policisë së Shtetit dhe forcat xheniere, ka planifikuar të prishë sot me shpërthim të kontrolluar një objekt 7 katësh në vijën bregdetare të Kavajës.
Për këtë operacion, në trupin e objektit forcat xheniere kanë hapur 730 furnela (vrima) ku do të montohen 70 kilogramë lëndë shpërthyese si dhe 4 mijë metër linear fitil. Inspektorët e IKMT dhe policisë së Shtetit kanë marrë të gjitha masat për perimetrin e sigurisë dhe lajmërimin e banorëve të zonës. Shpërthimi i kontrolluar do të ekzekutohet në orën 15.00.
