Ashtu siç ishte paralajmëruar më herët gjatë ditës, IKMT ka shembur në orën 15:00 me një shpërthim të kontrolluar “Prestige Resort”, hotelin e vendosur në Golem, që është në pronësi të drejtuesit të “Focus Media Group”, Irfan Hysenbelliu.
Shembja pas montimit të 70 kg tritoli në strukturën e ndërtesës erdhi 4 ditë pas nisjes së aksionit, ku u bë rrethimi i godinës nga punonjësit e IKMT e dhjetëra efektivë të Policisë së Shtetit dhe u nxorën me forcë pjesëtarët e stafit të resortit.
Drejtuesja e IKMT-së, Dallëndyshe Bici nuk ka denjuar të presë vendimin e nesërm të Gjykatës Administrative të Durrësit, pas kërkesës së avokatëve të kompanisë “Erioni Shpk” për të pezulluar shembjen, por ka zbatuar urdhrin e prerë që ishte dhënë për përfundimin e aksionit brenda fundjavës.
Plot 70 kilogram eksploziv si dhe 4 mijë metër linear fitil u instaluan në godinë gjatë këtyre ditëve për të bërë të mundur hedhjen në erë të saj.
Objekti 7 katësh në brigjet e Adriatikut u rrafshua në vetëm pak sekonda, duke u shndërruar në një grumbull gjigand intertesh.
Aksioni për rrafshimin e plotë të “Prestige Resort” erdhi 2 muaj pas valës së parë të “sulmit” nga IKMT, në kohën kur Dallëndyshe Bici sapo u riemërua në detyrë nga kryeministri Edi Rama, të cilit i ishte prishur qetësia nga raportimet kritike të mediave të “Hysenbelliu Group” përkundrejt tenderave korruptivë dhe keqqeverisjes.
Asokohe rruspat u ndalën vetëm me shembjen e dy pishinave dhe pistës së resortit, leja për të cilat ishte firmosur nga vetë shefi i qeverisë.
