Qamil Taja, 25-vjeçari shqiptar që i mori jetën me dy plumba në kokë të dashurës së tij Kristjana Brakaj në Athinë ka dalë sot rreth orës 10:30 para gjykatës, duke mos thënë asnjë fjalë për mediat, teksa kishte mbuluar kokën me kapuç dhe fytyrën me maskë.
Ai hyri në Gjykatën e Pireut nën masa dramatike sigurie dhe qëndroi në zyrën e hetuesve për më shumë se 2 orë, duke shprehur edhe pendesë për krimin e rëndë që kreu për shkak të xhelozisë patologjike për 19-vjeçaren.
Prokurori e ka akuzuar të riun për “vrasje me dashje” kryer në gjendje të qetë shpirtërore, ndërsa avokati I 25-vjeçarit në deklarimet e tij ka theksuar se ai është i penduar dhe i dërrmuar nga përfundimi tragjik.
“Ai kërkoi dhe iu dha një afat për të kërkuar falje. Ka shprehur pendimin. Ai është i shkatërruar. Nuk do të doja të bëja një deklaratë të parakohshme nëse ai kishte përdorur drogë apo jo”, tha avokati i autorit, Christos Divanidis pas mbylljes së seancës gjyqësore.
Sipas informacioneve, 25-vjeçari pretendon se si ai ashtu edhe viktima kanë pasur shpërthime xhelozie dhe se shkak i sherrit fatal që përfundoi në vrasje ka qenë një mesazh që 19-vjeçarja ka parë në celular.
Kujtojmë se pas krimit, 25-vjeçari u paraqit vullnetarisht në komisariat duke rrëfyer se ka vrarë partneren e tij.
Ndër të tjera, ai ka pohuar para efektivëve se ishte xheloz për 19-vjeçaren dhe se kishte përdorur kokainë, para se të merrte armën dhe ta qëllonte dy herë në kokë.
“Kam ardhur të dorëzohem. Unë vrava partneren time. Ajo ka vdekur në shtëpi”, ka thënë Taja në polici.
Pikëpyetjet për vrasjen e 19-vjeçares
Ndërkohë, policia po shqyrton me kujdes të gjitha provat që ka mbledhur për vrasjen mizore të 19-vjeçares në banesën në Pire.
Janë të shumta pyetjet që kërkojnë përgjigje:
Ku e gjeti armën dhe pse e kishte në banesë 25-vjeçari?
Ku shkoi pas vrasjes, pasi i tha policisë se nuk u dorëzua menjëherë, por fillimisht doli një shëtitje për të “kthjelluar” mendjen?!
Vrasja ndodhi në orët e para të së shtunës, kur 19-vjeçarja shkoi në shtëpinë e partnerit të saj 25-vjeçar në rrugën “Vamva 18” në Pire.
Ajo punonte në një lokal në Kallithea dhe ai në një lokal nate në Pire dhe tensionet në marrëdhëniet e tyre ishin të shpeshta, sipas burimeve policore.
Qemal Taja pasi qëlloi dhe vrau partneren e tij me dy plumba në kokë, e fshehu armën në frigorifer dhe më pas u dorëzua.
Pak më parë me postimin e tij në rrjetet sociale ka treguar xhelozinë e tij të sëmurë si arsyen e vrasjes së 19-vjeçares. Në fund të fundit, këtë pohoi ai në polici pak para se ta arrestonin, se ishte xheloz për të.
“Dobësitë…. Kisha një dobësi… Dashurova”, ka shkruar 25-vjeçari.
