Parregullsitë në prokurimet publike, pas të cilave ka një lumë ankesash nga pjesëmarrësit në gara po pengojnë përdorimin sipas programit të fondit buxhetor të investimeve kapitale.
Në këtë mënyrë taksat e shqiptarëve humbin efektivitetin pasi investimet kapitale janë zëri më produktiv i buxhetit për ndikimin që ka në rritjen ekonomike dhe përmirësimin e cilësisë së jetës.
Ministria e Financave ka njoftuar se, krahasuar me planin vjetor, për 9 mujorin e vitit 2022, shpenzimet kapitale janë realizuar në masën 42.4 për qind të planit vjetor sipas buxhetit fillestar dhe 45.1 për qind të planit vjetor sipas ndryshimeve në aktin normativ
Sipas kësaj ecurie qeveria ka në dispozicion për të shpenzuar edhe 55 % të zërit të investimeve vetëm në tre muaj.
Financimi i brendshëm është realizuar në masën 42.9 për qind të planit vjetor të ndryshuar, ndërsa Investimet nga të ardhurat e arsimit të lartë janë realizuar në masën 53.8 për qind të planit vjetor fillestar dhe të ndryshuar.
Ministria e Financave ka shpjeguar për Kuvendin se, ngadalësimi i investimeve publike në 6-mujorin e pare te vitit, si rezultat i rritjes së lartë dhe të menjëhershëm të çmimit te hekurit, çimentos dhe disa materialeve të tjera të ndërtimit.
Shumë kompani u gjendën përballë faktit që me kontratat publike te miratuara mund të shkonin drejt humbjeve financiare duke rrezikuar punësimin dhe te ardhmen e kompanive. Për këtë qëllim u miratua në qershor të këtij viti edhe një AN i cili synoi zhbllokimin e situatës, sqaroi Ministria e Financave.
Edhe në vitet normale kur situata e çmimeve nuk ishte problem, qeveria ka përqendruar përdorimin e fondeve të investimeve në muajin dhjetor. Sipas të dhënave zyrtare nga Ministria e Financave, investimet kapitale faktike më 2021 arritën një vlerë prej 128 miliardë lekësh (mbi 1 miliard euro), por 32 % e kësaj vlerë 42 miliardë lekë ( 340 milionë euro) u dhanë gjatë muajit dhjetor.
Një shkak tjetër që bëhet pengesë pothuajse çdo vit janë procedurat e ngadalta të prokurimeve qe në shumicën e rasteve shkojnë drejt ankimimeve.
Parregullsitë në tenderë dhe mungesa e konkurrencës i kanë shtuar ankesat të cilat kërkojnë kohë deri sa të sqarohen nga Komisioni i Prokurimit Publik dhe shpesh gjykatat.
Shpenzimet kapitale, për periudhën 9 mujore të vitit 2022 kanë një realizim në masën rreth 50.7 miliard lekë, ku financimi i brendshëm është realizuar në masën rreth 25.1 miliard lekë. Financimi i huaj ka shënuar një realizim prej rreth 11.4 miliard LEK ose 70.5 për qind të planit të periudhës.
Fondi i rindërtimit është realizuar në masën rreth 13.7 miliard LEK ose 95.7 për qind në raport me fondet e planifikuara për këtë periudhë. Nga shpenzimet për fondin e rindërtimit rreth 4.4 miliard LEK janë shpenzime nga Qeverisja Qendrore dhe 9.3 miliard LEK janë shpenzime nga Qeverisja Vendore.
Financimi i huaj është realizuar në masën 32.9 për qind të planit vjetor sipas buxhetit fillestar dhe 33.5 për qind të planit vjetor të ndryshuar me akt normativ.
Fondi i rindërtimit është realizuar në masën 68.4 për qind të planit vjetor fillestar dhe të ndryshuar.
