Një aksident i frikshëm automobilistik i ndodhur rreth orës 20:00 të mbrëmjes së djeshme në Marola ka lënë të plagosur rëndë një çift shqiptarësh që ndodhen në reanimacion në spitalin Sant’Andrea.
Sipas mediave italiane në aksident u përfshinë tre makina, por të lënduarit më rëndë mbetën burrë e grua (respektivisht shoferi dhe pasagjerja) që lëviznin me një automjet tip “Audi A3”, pjesa e përparme e të cilit u shkatërrua plotësisht.
Makina po lëvizte në drejtim të qytetit me një shpejtësi mjaft të madhe, kur fillimisht goditi një makinë të bardhë në të cilën ndodheshin dy të rinj që për fat nuk pësuan lëndime, e duke vazhduar më pas zbritjen në shkallët e Belvedere, ku u përplas me një makinë me ngjyrë të errët.
Fatmirësisht edhe shoferi i makinës tjetër nuk ka marrë lëndime të rënda.
Anëtarët e ekipit të emergjencave që mbërritën në vendngjarje u gjendën përballë një skene rrëqethëse.
U desh ndërhyrja e zjarrfikësve, mjekëve dhe infermierëve me dy autoambulanca për të nxjerrë ende me shenja jete prej mjetit të shkatërruar çiftin e shqiptarëve.
Aksidenti në Napoleonica detyroi policinë lokale dhe karabinierët, të cilët ndërhynë për të hetuar, të bllokonin kalimin e mjeteve në rrugë, duke izoluar në mënyrë efektive të gjithë bregdetin perëndimor.
