Një 42-vjeçar shqiptar është ekzekutuar me armë zjarri në qendër të qytetit të Krefeld, në veriperëndim të Duseldorfit, në Gjermani.
Ngjarja e rëndë ka ndodhur mbrëmjen e së hënës rreth orës 20:00 dhe sipas BILD shqiptari ishte duke lëvizur me biçikletë në pjesën jugore të qytetit të njohur si Garnstraße.
Pas disa të shtënave, shqiptari u rrëzua i vdekur në mes të rrugës. Autori ose autorët mësohet se e kanë qëlluar në pjesën e pasme të kokës nga një distancë e shkurtër, me sulmin që duket si një ekzekutim i pastër.
“Ka ndodhur një vrasje”, ka konfirmuar deri tani një zëdhënës i policisë. Nuk ka detaje të mëtejshme për ngjarjen që ka ndodhur në një rrugë realisht të qetë dhe të ngushtë me rezidenca banimi.
Policia po vijon kërkimet për autorin ose autorët e arratisur, por deri më tani nuk ka asnjë arrestim.
