Një gjykatë në Mançester të Britanisë së Madhe ka dënuar me 50 vite burg në total një grup prej 5 shqiptarësh, të cilët drejtonin një “call-center” që funksiononte për të marrë telefonata nga klientë që blinin kokainë në disa zona përreth qytetit.
Ata e organizonin grupin e tyre, nëpërmjet një qendre thirrjesh të vendosur në një banesë, ku me anë të një telefoni celular, klientët mund të porosisnin lëndën narkotike. Një celular i veçantë përdorej më pas për të dërguar korrierët për të shpërndarë drogën.
Operacioni i shpërndarjes së drogës kishte si bazë Preston dhe Chorley dhe funksiononte 24 orë në ditë dhe shtatë ditë në javë. Prej këtij “call-centeri droge” vlerësohet që 5 shqiptarët të kenë furnizuar me dhjetëra kilogramë kokainë zonën, me fitime që vlerësohet të arrijnë në rreth 2 milionë paund.
Grupi u shpërbë pas një hetimi të gjatë dhe kompleks nga “Lancashire Constabulary”. Pesë anëtarët kryesorë u burgosën pasi u shpallën fajtor dhe dënuan për furnizimin me drogë e cilësuar si e klasit A, pas një gjyqi që nisi në fillim të këtij viti.
“Koka” e grupit sipas mediave britanike ishte 35-vjeçari Bekim Hasmegaj, banues në Marchwood Close, Blackrod. Ai u dënua me 10 vite burg, ndërsa 25-vjeçari Albi Hoxhaj, i cili punonte në qendrën e thirrjeve u burgos për 5 vite e 10 muaj.
Ndërkohë, 33-vjeçari Klevis Prenci, banues në Lee Lane, Horwich u burgos me katër vjet e dy muaj. Ai u dënua më herët me burgim prej tre vitesh e nëntë muajsh për posedim të drogës së klasit A me qëllim furnizimi.
Prenci konsiderohej si njeriu kyç në grupin e shpërndarjes pasi ishte përgjegjës për ndarjen e drogës në porcione, mbledhjen e parave dhe furnizimin e korrierëve.
Sa i përket 37-vjeçarit Altin Nikolli nga Anglebank, Horwich, ai u dënua me pesë vjet e gjashtë muaj burg. Ai ishte i përfshirë në stafin e “call-center”. Ai merrej me strehimin dhe kujdesin për korrierët e rinj.
Aurel Hila, 39 vjeç, luajti një rol më të vogël për bandën. Ai u largua nga Britania dhe u dënua në mungesë për pesë vjet.
Ndërkaq, pesë anëtarë të tjerë të grupit që vepronin si korrierë ishin dënuar më parë me 14 vjet e dy muaj gjithsej për posedim të drogës me qëllime përfitimi.
Afati total i burgut për grupin është 48 vjet e 2 muaj. Gjatë hetimeve, prokurorët e përshkruan operacionin si “i ngjashëm me një kompani taksish” me linja telefonike që funksionojnë 24/7.
Rosalind Scott-Bell e përshkroi ndërmarrjen “si një biznes familjar”, duke shtuar: “Është e qartë se furnizimi i drogës ishte i shkëlqyeshëm dhe i shpejtë”. Detektivja Fiona Jackson, nga Policia e Lancashire , tha: “Këto dënime të rëndësishme vijnë si rezultat i një hetimi kompleks nga oficerët dhe stafi ynë dhe unë do të doja t’i falënderoja ata për profesionalizmin dhe punën e tyre të palodhur në rrëzimin e këtij grupi të krimit të organizuar. Ne do të vazhdojmë të ndjekim pa pushim ata që janë të përfshirë në krimin e organizuar, duke ndërprerë dhe çmontuar operacionet e tyre”.
“Ne do të sigurojmë që personat e përfshirë në krim të rëndë dhe të organizuar të mos përfitojnë financiarisht nga aktivitetet e tyre duke sulmuar financat e tyre, duke e bërë më të vështirë lëvizjen, fshehjen dhe përdorimin e produkteve të krimit”, shtoi ajo.
