Të paktën tre persona u vranë dhe 11 të tjerë u plagosën të premten pasi një person i armatosur hapi zjarr në dy shkolla në shtetin brazilian të Espirito Santo, sipas autoriteteve lokale.
Sulmet ndodhën në qytetin e vogël të Aracruz, 50 milje në veri të kryeqytetit të shtetit, Vitoria.
Sulmuesi i dyshuar – i cili u pa në pamjet e sigurisë duke mbajtur një armë gjysmë automatike, të veshur me veshje ushtarake dhe një mbulesë të fytyrës – është arrestuar nga policia. I dyshuari nuk është identifikuar ende nga autoritetet, por mediat lokale, përfshirë CNN Brasil degën e CNN, kanë raportuar se individi është një 16-vjeçar.
Guvernatori i Espirito Santo, Renato Casagrande, në një postim në Twitter të premten, konfirmoi se “skuadrat e sigurisë kapën sulmuesin, i cili, frikacak, sulmoi dy shkolla në Aracruz. Kam shpallur tre ditë zie zyrtare në shenjë pikëllimi për humbjet e pariparueshme. Ne do të vazhdojmë të hetojmë arsyet dhe së shpejti do të kemi sqarime të reja”.
Guvernatori tha se sulmet ndodhën në shkollën Primo Bitti dhe në Qendrën Arsimore Praia de Coqueiral.
Duke folur për mediat, ministri i Sigurisë Publike Marcio Celante tha se policia beson se i dyshuari ka vepruar i vetëm bazuar në videon e sigurisë, por pranoi se nevojiteshin hetime të mëtejshme për të përcaktuar më shumë detaje mbi incidentet.
Celante zbuloi gjithashtu disa nga ato që tregonte videoja e sigurisë.
