Akuzohen për të paktën 51 vjedhje/ Çmontohet banda e “skifterëve” në Greqi, tre shqiptarë në pranga
Një bandë grabitësisht që kishte në përbërje edhe shqiptarë është çmontuar nga policia greke në Athinë.
Tre të rinjtë shqiptarë, përkatësisht 16, 17 dhe 18 vjeç kishin në shënjestër shtëpi luksoze, dyqane dhe zyra, operonin kryesisht në zonën e Atikës, në kryeqytetin helen.
Nga hetimet paraprake deri më tani janë zbardhur 51 raste të vjedhjeve, në periudhën nga 7 prill 2021 deri më 18 nëntor 2022.
Akuzat ndaj shqiptarëve janë rënduar pasi në momentin e arrestimit u janë gjetur në posedim edhe lëndë narkotike, saktësisht 40.48 gramë kanabis.
Autoritetet greke kanë identifikuar edhe tetë anëtarë të tjerë të bandës, dy prej të cilëve janë arrestuar.
Të arrestuarit u dërguan në Prokurorinë Penale të Athinës, ndërsa hetimet po vijojnë për kapjen e pjesëtarëve të mbetur të organizatës kriminale.
