Mediat italiane kanë publikuar detaje të reja nga ngjarja e rëndë që tronditi rajonin e Venecias pak ditë më parë, kur Viron Karabollaj për shkaqe xhelozie i mori jetën ish-bashkëshortes së tij Mynerve Karabollaj (Vera Myrtaj) dhe partnerit të saj Flonino Mërkuri.
Ngjarja që dodhi në rrugën “Leopardi” në Spinea tronditi opinionin publik të dielën e 20 nëntorit, ndërsa rezulton se Karabollaj dyshohet që fillimisht ka qëlluar në kokë me 1 plumb ish-bashkëshorten, ndërsa më pas ka sulmuar me thikë 23-vjeçarin.
Flonino Merkuri është goditur vazhdimisht me thikë dhe më pas 41-vjeçari e ka ndjekur deri në garazhin e shtëpisë, ku i riu ka tentuar më kot të ikë për të shpëtuar nga sulmi brutal.
Pasi i mori jetën të dashurit të saj, ai u kthye për të goditur sërish ish-bashkëshorten, por këtë herë me thikë. Plumbi që e ka goditur Verën në kokë, në nivelin e syve, në fakt nuk i ka shkaktuar vdekjen dhe për këtë Karabollaj i është dashur t’i shkaktojë plagë me thikë në trupin e gruas.
Autopsia numëroi gjithsej dhjetë goditje, nga të cilat ato që arritën në zemrën dhe mushkëritë e 37-vjeçares ishin fatale. Ndërkohë, më e rëndë ka qenë prognoza për Mërkurin që është goditur 55 herë me thikë nga 41-vjeçari, i cili më pas vari veten.
Në mënyrë të pabesueshme, asnjë nga fqinjët nuk dëgjoi zhurmë: as të shtënat dhe as britmat e viktimave. Të vetmet klithma që u dëgjuan dhe u raportuan në hetues ishin ato të vajzës së Verës, e cila duke u kthyer në shtëpi në mbrëmje, zbuloi trupin e Floninos në garazh.
Pasi përfunduan autopsitë e kryera nga mjeku ligjor Carlo Terranova, zv/prokurorja Daniela Moroni dje u dha leje familjarëve për varrimin, i cili do të bëhet në ditët në vijim.
