Policia e Shtetit ka publikuar pamjet e megaoperacionit antidrogë të koduar “Konsistenca”, i zhvilluar nën drejtimin e SPAK, dhe në bashkëpunim me policinë malazeze dhe DEA-n amerikane, që çoi në zbulimin e një ngarkese me 430 kg kokainë të ardhur nga Kolumbia, e fshehur në 20 paleta me pleh kimik.
Operacioni është mbajtur top-secret siç edhe vetë prokurori i çështjes Adnan Xholi sqaroi në deklaratën për mediat.
Sipas njoftimit të policisë është goditur një grup i strukturuar kriminal në fushën e trafikimit të drogave të forta (kokainë), duke çuar pas hekurave 10 shtetas për veprën penale “Trafikimi i lëndëve narkotike”.
Gjithashtu, strukturat e Policisë kanë kryer kontrollin e 14 ambienteve, në qytete të ndryshme (Tiranë, Lushnjë dhe Fier), dhe si rezultat, janë sekuestruar: 6 armë zjarri, 2 armë gjahu, municion luftarak, rreth 16 000 euro dhe 20 paleta me rreth 24 ton “pleh artificial”, brenda të cilit, ekzistojnë dyshime të arsyeshme, të bazuara në prova se gjendet një sasi prej rreth 430 kg lëndë narkotike kokainë, vlera e së cilës, referuar shitjes në tregun me pakicë, kap shifrën rreth 40 milionë euro.
Në rrjetën e drejtësisë gjatë këtij operacioni ka rënë ish-kreu i Komunës Frakull për PS, Viktor Çervanaku dhe porositësi i ngarkesës me pleh kimik, vëllai i tij Zenel Çervanaku.
Nga familja në fjalë është pas hekurave dhe i biri i zyrtarit të PS, Denilson Çervanaku dhe e dashura e tij Enxhi Ferhati, por edhe emra të tjera të njohur të botës së krimit si Bledar Matoshi që u ndalu me një “Range Rover” dhe armë zjarri në Rrugën e Arbrit.
TË ARRESTUARIT:
- Viktor Çervanaku
- Zenel Çervanaku
- Denilson Çervanaku
- Enxhi Ferhati
- Nikolin Gjolena
- Klajdi Vrioni (Kodra)
- Julian Malaj
- Redion Meshi
- Bledar Matoshi
- Marildo Rona
