Detaje të reja janë zbuluar sot nga operacioni i përbashkët i DEA-s amerikane dhe Prokurorisë së Posaçme (SPAK) që nisi në portin e Tivarit në Mal të Zi dhe përfundoi në fshatin Frakull e Madhe të Fierit, duke çuar pas hekurave 15 persona.
Arrestimet u kryen pas zbulimit dhe sekuestrimit të rreth 600 thasëve (400 kg) me plehra kimikë, ku brenda tyre ka përmbajtje kokaine dhe fishekësh. Kjo ngarkesë ka hyrë nga Mali i Zi në Shqipëri, teksa fillimisht ishte nisur nga Kolumbia për në portin e Tivarit.
Droga u gjet në banesën e ish-kryetarit të komunës Frakull për PS, Viktor Çervanaku, i cili pas ndarjes së re administrative në 2015 ka kryer një sërë funksionesh publike dhe së fundmi mban një rol drejtues në Bashkinë e Tiranës.
Për ngjarjen reagoi edhe kryeplaku i fshatit Frakull i Madh, Fiqeret Muçaj i cili tha se 50 efektivë policie ishin angazhuar në aksion në Fier, ndërsa konfirmoi se Çervanaku mban rol drejtues në Bashkinë e Tiranës.
“Çervanakun nuk e njoh për të tillë, ka qenë kryetar komune. Është drejtor në bashkinë e Tiranës. Nuk është magazinë, e ka shtëpi” deklaroi Fiqeret Muçaj.
Ndërkohë, ditën e sotme është sqaruar se në pranga gjatë operacionit përveç Viktor Çervenakut, ka rënë edhe djali i tij Denilson Çervenaku dhe Enxhi Ferhati, e fejuara e këtij të fundit.
Sakaq në kërkim është shpallur shtetasi kolumbian Zaimir Rodriguez. Lënda narkotike me origjinë nga Kolumbia fshihej në thasët me pleh kimik, të cilët ishin porositur nga një kompani që rezulton e regjistruar në emër të Zenel Çervenakut.
Ndërkaq, sipas “News24” koka e organizimit të këtij trafiku është shtetasi Nikolin Gjolena, që tashmë ka përfunduar në pranga.
Më herët gjatë së enjtes në kuadër të këtij operacioni u arrestuan 4 persona në Rrugën e Arbrit, të cilët qarkullonin me një automjet “Range Rover”, ku ishin të fshehura edhe 2 armë zjarri pistoleta.
Të arrestuarit janë Bledar Matoshi, 33 vjeç, i dënuar më parë për armëmbajtje pa leje; Kid Koshena, 28 vjeç, i dënuar më parë për plagosje të rëndë; Klajdi Vrioni (Kodra), 32 vjeç, i dënuar më parë për armëmbajtje pa leje dhe për plagosje të rëndë dhe Redion Meshi, 22 vjeç, i cili drejtonte automjetin ku u gjetën armët.
Ndërkohë, në laboratorin që u zbulua në fshatin Fratar të Fierit janë kapur edhe 2 kallashnikov, një shotgan dhe një çifte.
TË ARRESTUARIT:
- Viktor Çervanaku
- Zenel Çervanaku
- Denilson Çervanaku
- Enxhi Ferhati
- Nikolin Gjolena
- Klajdi Vrioni (Kodra)
- Julian Malaj
- Redion Meshi
- Bledar Matoshi
- Marildo Rona
LEXO EDHE:
Operacioni i DEA, arrestohet zyrtari i rëndësishëm i Bashkisë Tiranë
Droga në Fier, përgjimet qysh nga gushti kur u soll në shtëpinë e Çervenakut
