Nënkryetarja e Kuvendit, Ermonela Felaj ka mbrojtur gjatë fjalës së saj në Kuvend projektin e qeverisë për Portin e Durrësit.
Ajo e krahasoi investitorin arab me princ Vidin.
“M’u kujtua kur erdhi princ Vidin ë Shqipëri, u prit me duartrokitje, por më pas u sulmua. Ai erdhi me gruan e tij të veshur ne dekolte. Kjo ishte shumë për njerëzit injorantë të asaj kohe. Sot po flasim për investitorë. Alabar nuk është gjë tjetër veçse është Emar. Mos shkoni me logjikën e dekoltes. Serioziteti kërkon lexim”, deklaroi Felaj.
Deklarata e saj u ironizua nga deputeti Dashamir Shehi.
“Kjo me dekoltenë ishte shumë e bukur. Ai paska ikur i shkreti atëherë 100 vjet përpara për shkak të dekoltesë. Sikur të ikë edhe ky tjetri për shkak të fehrexhesë. Nga dekolteja po kalojmë te fehrexheja. Po kthehemi të fehrexheja. Të vijmë pas 100 vjetëve të diskutojmë për fehrexhenë, më duket e tepruar”, u shpreh Shehi.
Shehi tha se kompania në fjalë është në borxh në vendin e origjinës dhe ngriti dyshime për afatin e kërkuar për dorëzimin e projektit.
“Është në borxh akoma kompania atje. Dhe po kjo kompani borxhlinjsh është duke ardhur këtu. Pse duan këta 20 vjet. Çfarë po bëjnë këta central bërthamor. Këtu ka një sërë dyshimesh. Pronësia një pjesë vjen nga parajsat fiskale”, tha ai.
