Shkodra është qytetit i goditur më rëndë nga moti i keq dhe nga papërgjegjshmëria e treguar nga autoritetet për të përballur fluksin e prurjeve në kaskadën e Drinit.
Kryeqendra e veriut të vendit është nën pushtetin e ujit dhe banorët po përjetojnë makthin e përmbytjeve të 11 viteve më parë.
Shtëpi të mbushura me ujë, xhamia e “Plumbit” thuajse e fundosur, ura e vjetër e “Bahçallëkut” e përpirë nga Buna dhe banorë me lot në sy e mushama hedhur krahëve që përpiqen të shpëtojnë ç’të munden nga banesat e tyre, përbëjnë panoramën e një drame 72 orëshe të shkaktuar sa nga Zoti dhe nga dora e njeriut në Shkodër.
Fotot, të cilat janë shkrepur nga LSA dhe nga Florian Goga për llogari të agjencisë së lajmeve Reuters tregojnë vështirësitë me të cilën po përballen qindra banorë të Shkodrës, me situatën që pothuajse përsëritet çdo vit për ta.
Dëmet që janë shkaktuar, kryesisht në bujqësi pritet të jenë kolosale, pasi mijëra hektarë tokë janë ende nën ujë, teksa reshjet vijojnë të mos ndalen.
