Qindra milionë dollarë që Faruk Ozer i mbante në një server janë zhdukur gjatë arrestimit në Shqipëri. Kështu deklaron gazetari turk Cevheri Guven, përmes një reagimi për çështjen në rrjetet sociale.
Gjykata e Elbasanit vendosi pak ditë më parë të ekstradonte turkun Fatih Faruk Ozer.
Ai akuzohet nga autoritetet turke për një mashtrim me vlerë rreth 2 miliardë dollarë me kriptomonedhat. Vetë Ozer i mohon akuzat dhe thotë se ato janë të motivuara politikisht. Turku u arrestua gjatë verës duke pushuar në Jug.
Autoritetet turke e kanë hetuar çështjen në vijimësi deria ranë në gjurmë të tij.
Për këtë çështje ka dhënë detaje gazetari turk, Cevheri Guven. Në kanalin e tij në Youtube, ai thotë se Ozerit i ka humbur një shumë e madhe parash në momentin e arrestimit.
Sipas gazetarit, bëhet fjalë për qindra milionë dollarë që turku i mbante në një server i cili tashmë është zhdukur.
Guven thotë se Turqia nisi një ekip të posaçëm disa muaj më parë për kapjen e Ozerit në Shqipëri. Pas ndjekjes së konstatimit ata njoftuan policinë shqiptare për kryerjen e arrestimit. Fill pas arrestimit, i njëjti ekip i ardhur prej Turqisë kërkoi paratë e vjedhura.
“Këto para nuk iu kthyen turqve. U morën për të shkuar në xhepa të tjera. Në fillim e lanë të vjedhë dhe të mashtrojë. Pastaj shkuan e kapën në Shqipëri. I vodhën paratë që ai kishte vjedhur nga turqit. Tani po e çojnë në Turqi”, thotë gazetari Cevheri Guven.
