Sonte në emisionin “Mendo për mua” vjen nje tjetër histori e trishtë. Këtë radhë, një grua e moshuar kërkon ndihmë sepse vetmia e ka kapluar brenda mureve të shtëpisë e cila thuajse po shembet dhe s’ka asnjë njeri që të kujdeset për të.
“Jam, Afërdita Elezi, ju lutem më ndihmoni, 72 vjece e vetme, burri ka 3 vite që ka ndërruar jetë. Ju lutem mendoni për mua shpirt se vetmia është gjë e keqe zemër”-thotë e moshuara në videomesazh.
Menjëherë pas kësaj thirrjeje dëshpëruese, stafi i emisionit udhëtoi drejt fshatit Shelcan të Elbasanit për të takuar Afërditën.
“Gjatë ditës merresh me ndonjë punë, ama natën…Kam 3 vjet kështu. Ishte kismeti im, të paktën të kisha një fëmijë, burri më iku. Burri im ishte traktorist, unë dikur kam punuar në kooperativë”-tha Afërdita.
Teksa tregonte shtëpinë ku jetonte e vetme, Afërdita thotë se mban një shkop pranë derës që ndryshe e quan “arma e natës”, sepse ajo ka frikë se mund të bjerë “pre” e hajdutëve.
“Kur ra tërmeti, mu plasarit shtëpia. Dritaren me plastmas, se di mirë do isha të kisha vetëm një fëmijë”-shton 72 vjeçarja.
