Ambasadorja e Shteteve të Bashkuara të Amerikës, Yuri Kim zhvilloi sot një takim me Gjeneral Brigade Arben Kingji për herë të parë në cilësinë e Shefit të Shtabit të Ushtrisë, ku në fokus ishte forcimi i marrëdhënieve mbrojtjes SHBA-Shqipëri.
Siç bën me dije ambasada, Kim-Kingji ranë dakord të rrisin bashkëpunimin në vazhdim të stërvitjes historike Defender Europe 2021 dhe në përgatitje për stërvitjet e ardhshme Defender Europe 2023.
Të dy diskutuan ndikimin pozitiv të selisë së Komandës së Forcave Operacionale Speciale të SHBA (SOCEUR) në Shqipëri dhe aktivitetet e Brigadës së Forcave të Sigurisë dhe të Ndihmës së Ushtrisë së SHBA (SFAB).
Ata diskutuan gjithashtu përgjigjen ndaj përmbytjeve shkatërruese në veri, me gjeneralin Kingji që shprehu vlerësimin për kontributin e SHBA në trajnime, pajisje (përfshirë automjetet e urgjencës dhe gomone) dhe furnizime të tjera, dhe ambasadorenq Kim që përsëriti gatishmërinë e SHBA për të ofruar mbështetjen e nevojshme.
Shkak i përmbytjeve janë bërë reshjet e shumta por edhe keqmenaxhimi i kaskadës që kanë çuar në hapjen e portës së hidrocentralit të Vaut të Dejës. Për pasojë uji ka “pushtuar” çdo shtëpi duke shkaktuar dëme të mëdha materiale. Kujtojmë që ditën e sotme kreu i PD-së Sali Berisha ka zbarkuar në Shkodër, ku ka kërkuar që të gjithë banorët të dëmshpërblehen.
Aktualisht, vendi është përfshirë nga reshja të dendura shiu, ku situata më problematike është paraqitur në qarkun e Shkodrës, ku qindra banesa janë nën ujë, ndërsa mësimi është pezulluar në 16 shkolla. Moti i keq ka shkaktuar 2 viktima, ku babë e bir kanë humbur jetën pasi u bllokuan në makinë pas vërshimit të ujit në përroin e fshatit Bogë.
