Nga Boldnews.al
Në mes të zhurmës politike dhe publike për projektin e Portit të Jahteve në Durrës, biznesmeni saudit, Mohamed el Alabar ka nisur rekrutimin e bashkëpunëtorëve të tij për kompaninë në Shqipëri.
Në Dhjetor të vitit 2021, kompania “North East Real Estate”, me seli në Dubai, bleu për 100 mijë lekë të vjetra aksionet e “Symphony Real Estate Development”, një shoqëri off-shore nga ishujt Kajman, që kishte fituar pak më herët statusin e investitorit strategjik nga kryeministri Edi Rama për ndërtimin e Marinës së Jahteve në Durrës.
Pas këtij transaksioni, emri i kompanisë investitor strategjik ndryshohet në “Eagle Hills Real Estate”.
Në tetor 2022, kompania regjistron Alabari si një prej pronarëve përfitues, ndërkohë që vendos edhe një numër telefoni për kontakt me palët e treta.
Numri i kontaktit i përket financieres durrsake, Elisabeta Hajrullai. Ekspertja e financës ka qenë një prej bashkëpunëtorëve më të ngushtë të biznesmenit shqiptar, Samir Mane.
Sipas të dhënave publike, Hajrullai ka punuar për të paktën 15 vite në kompanitë e Manes, ku ka mbajtur role kyçe në administrimin e parave të sipërmarrësit më të pasur shqiptar.
Pas një bashkëpunimi jetëgjatë, financierja vendos të largohet nga Mane, për t’iu bashkuar kompanisë së Alabarit.
Ndoshta është një zgjedhje profesionale e financieres.
Por, në një situatë, ku opozita, por jo vetëm, ngrenë dyshimet se pas projektit të Alabarit, në fakt fshihen interesa të biznesmenëve vendas, lëvizja e Hajrullait nga Samir Mane tek sipërmarrësit saudit, nuk duket aq rastësore.
Nga Samiri tek Alabari
Në dokumentat zyrtare të dorëzuar në Qendrën Kombëtare të Biznesit (QKB), kompania investitor strategjik e Portit të Durrësit ka vendosur si kontakt numrin 06xxxxx199.
“Boldnews.al” kreu verifikimet të mëtejshme në qendrën e biznesit dhe rezultoi se i njëjti numër gjendet i regjistruar tek “Personi fizik” Elisabeta Hajrullai, me objekt “Formim profesional per hoteleri turizem dhe trajnime”.
Ky biznes është krijuar në vitin 2019 dhe, në shkurt të vitit 2022, ka vendosur statusin “Pezulluar”.
Në vijim të verifikimeve në burime të hapura, “Boldnews.al” gjeti të dhëna të vetëdeklaruara nga financierja Hajrullai në rrjetin “LinkedIN”.
Aktiviteti i saj profesional lidhet tërësisht me kompanitë e Samir Manes.
Në vitin 2006, Elisabeta Hajrullai është punësuar si financiere në shoqërinë “Euromax”, e cila kontrollonte një rrjet supermarketesh në pronësi të Manes.
Më tej, ajo ka mbajtur pozicione të financieres dhe kryefinancieres në kompanitë e tjera të Samir Manes, “Tirana East Gate-TEG”, “MANE TCI” dhe “Albchrome”.
Të dhënat që gjenden në rrjetin social profesional, përputhen edhe me informacionet që rrodhën vitin e kaluar për pagat e shqiptarëve.
Në atë listë, në kraj të emrit të Elisabeta Hajrullait, qëndron shënimi “Drejtore Departamenti” në kompaninë “Albchrome”, e cila në atë kohë ishte në pronësi të Samir Manes. Paga mujore e Hajrullait ishte 382 mijë lekë të reja.
Pra, nuk ka asnjë dyshim që financierja Elisabeta Hajrullai ka qenë një prej bashkëpunëtorëvë më të ngushtë të Manes dhe, me shumë mundësi, edhe një prej më të besuarave, përsa kohë ka pasur në tavolinën e saj të punës bilancet dhe lëvizjet financiare të miliarderit shqiptar.
Kush fshihet pas Marinës së Durrësit
Qeveria thotë që investitori strategjik është biznesmeni i njohur saudit, Mohamed El Alabar dhe kompanitë e tij të fuqishme të ndërtimit nga Dubai.
Ndërsa, opozita dhe përfaqësues të shoqërisë civile e konsiderojnë Marinën e Jahteve një projekt mafioz, që do të përdoret për pastrim parash nga narko-trafikantët dhe biznesmenët – oligarkë shqiptarë.
Në mungesë të informacioneve të plotë, e vërteta mund të qëndrojë diku në mes të këtyre qëndrimeve.
Biznesmeni saudit, Mohamed Alabar, ka vendosur emrin e tij në kompaninë e regjistruar në Shqipëri, “Eagle Hill Real Estate”, e cila ka fituar të drejtën për të zhvilluar projektin 2 miliardë euro.
Por, Alabari rezulton të jetë aksioner i vetëm 40 përqind të kompanisë mëmë, “North East Real Estate” me seli në Dubai, ndërkohë që nuk është përfshirë asnjë prej shoqërive të tij të mirënjohura ndërtuese, si edhe nuk dihet ende se kush zotëron 60 përqind të aksioneve.
Pra, të paktën deri më tani, kanë vend dyshimet e opozitës për pronarët e panjohur. Por, edhe dyshimet për përfshirjen e oligarkëve shqiptarë, nuk duket se janë edhe aq pa bazë.
Fakti që kryefinancierja jetëgjatë e Samir Manes, tashmë është e punësuar tek Alabari i Portit të Durrësit, forcon bindjen e skeptikëve se projekti i Marinës së Jahteve në Durrës fsheh interesat ekonomike të atyre që konsiderohen i “oligarkë” shqiptarë.
