Zbardhen të reja nga dosja e inceneratorit të Fierit, ku janë zbuluar edhe lidhjet e biznesmenit Arben Dervishaj me Klodian Zoton.
SPAK pretendon se Dervishaj ka udhëtuar të paktën dy herë drejt Torinos së bashku me Zoton për të parë ndeshjet e Juventusit. Ky i fundit ka paguar 2250 euro për një biletë që Dervishaj të ndiqte nga stadiumi ndeshjen mes Juventusit dhe Barcelonës, e luajtur më 11 prill të vitit 2017.
Udhëtimi tjetër i Arben Dervishajt që dyshohet se është sponsorizuar nga Zoto ka qenë ai i qershorit 2017, ku biznesmeni ka udhëtuar së bashku me vajzën e tij, R. Dervishi drejt Tel Avivit.
Në dosjen hetimore thuhet se qëndrimi në hotel në Izrael është paguar nga Zoto dhe fatura ka qenë 1920 dollarë.
Dervishaj sipas SPAK, përveç këtyre rasteve ka firmosur si të realizuara disa shërbime, të cilat nuk janë bërë, për të cilat akuzohet për korrupsion pasiv në funksionin e tij publik si mbikqyrës i punimeve nga kompania e Klodian Zotos, “Integreated Technology Wate Treatment” për inceneratorin e Fierit.
“Shtetasi Arben Dervishaj, në cilësinë e mbikëqyrësit të punimeve të shoqërisë koncesionare “Integrated Technology Waste Treatment Fier” sh.p.k., ka miratuar dhe më pas pasqyruar/dorëzuar pranë Autoritetit Kontraktor, Ministrisë së Mjedisit/Ministrisë së Infrastrukturës dhe Energjisë, situacione për punime fiktive të shoqërisë koncesionare, për shërbime që nuk janë kryer dhe pajisje që nuk janë realizuar në zbatim të kontratës koncesionare, ku në sajë të mashtrimit janë siguruar përfitime për shoqërinë koncesionare “Integrated Technology Waste Treatment Fier” sh.p.k, në vlerën 4,000,000 (katër milion) Euro, veprime në kundërshtim me ligjin nr. 8402, datë 10.9.1998 “Për kontrollin dhe disiplinimin e punimeve të ndërtimit”, i ndryshuar, si dhe Udhëzimin e Këshillit të Ministrave, nr.3, datë 15.02.2001, “Për mbikëqyrjen dhe kolaudimin e punimeve të ndërtimit”, i ndryshuar.
Gjithashtu, shtetasi Arben Dervishaj, në cilësinë e mbikëqyrësit të punimeve të shoqërisë koncesionare “Integrated Technology Waste Treatment Fier” sh.p.k, ka marrë përfitime të parregullta nga shtetasi Klodian Zoto, aksioner kryesor i shoqërisë koncesionare “Integrated Technology Waste Treatment Fier” sh.p.k, që kanë konsistuar në përfitime të vlerës së udhëtimeve të tij private për jashtë shtetit, biletave të avionit, qëndrimit në hotele dhe të biletave të ndeshjeve të futbollit në stadium në Itali”, ka njoftuar SPAK më herët.
Arben Dervishaj është edhe zëvendës president i dytë i Federatës Shqiptare të Futbollit dhe anëtar i Komitetit Ekzekutiv në FSHF.
