Lamia Elamri, 18-vjeçarja me origjinë marokene që ra viktimë e tërbimit vrastar të bashkëshortit të saj me origjinë shqiptare nuk ka ndërruar jetë siç ishte raportuar fillimisht, dhe tashmë gjendet në reanimacion jashtë rrezikut.
E reja u qëllua me armë zjarri në gjoks dhe iu nënshtrua një operacioni të vështirë në Poliklinikën e Barit.
Bashkëshorti i saj është identifikuar si shtetasi shqiptar Oltjon Sallaku. Ai e qëlloi 18-vjeçaren dhe pasi kujtoi se i kishte marrë jetën qëlloi edhe veten me pistoletë në kokë.
Sipas mediave lokale në Cassano delle Murge, tragjedia ka ndodhur mbrëmjen e djeshme në rrugën “Martin Luther King” dhe Sallaku ka përdorur armën pas sherrit me bashkëshorten.
Në momentin e të shtënave, vajza e vogël 2-vjeçare e çifti ndodhej me gjyshen nga nëna.
Oltjoni punonte si shtrues pllakash në Bari dhe të gjithë e kanë përshkruar si një djalë i mirë, por hije dyshimi e shoqërojnë ngjarjen dhe pyetja që shtrojnë hetuesit është se pse ai mbante armë në shtëpi.
Një mik i 21-vjeçarit ka treguar se e ka takuar pak para gjestit fatal dhe Oltjoni dukej i qetë, madje ka bërë shaka me të.
Por, çfarë ndodhi kur ai hyri në shtëpi?
Ka ende shumë pyetje që duhet të marrin përgjigje, ndaj puna e hetuesve vijon për të kuptuar se çfarë ka ndodhur.
