Gjykata e Posaçme ka nisur sot procesin gjyqësor ndaj Lulzim Berishës, Emiljano Shullazit dhe 5 të pandehurve të tjerë të akuzuar për vrasjen e Klodian Saliut e Vajdin Lames (ngjarje të ndodhura në vitin 2005).
Në këtë mënyrë trupi gjykues me kryetare Flora Harajdinaj ka hedhur poshtë kërkesën e avokatëve mbrojtës për riekespertim të gjendjes mendore të dëshmitarit të drejtësisë Luftar Reçi, i cili ka rrëfyer dhe zbardhuar ngjarjet e rënda kriminale për SPAK.
Në akt-ekspertimin e parë, mjekët kanë dalë në konkluzion se Reçi ka çrregullime të ankthit, por deklarimet e dhëna prej tij, në lidhje me personat që ekzekutuan Vajdin Lamen, mikun e tij Artan Arasi dhe Klodian Saliun, mund të merreshin si provë nga prokuroria.
Mbrojtësit e të pandehurve pretenduan se Reçi ka shfaqur shenja të sindromës së mitomanisë, që sipas tyre njihet si patologjia për të gënjyer. Sipas avokatëve, mitomanët janë të vetëdijshëm që po gënjejnë, por në momente specifike mund të arrijnë të besojnë historitë e tyre, gjë që i bën këta persona të gënjejnë për fakte e rrethana duke i servirur si të vërteta.
Pavarësisht argumenteve të avokatëve kërkesa e tyre është rrëzuar dhe tashmë do të ketë 6 të pandehur për dy vrasjet, me seancën e radhës që do të mbahet më 21 nëntor.
Seanca gjyqësore më parë ishte shtyrë për disa herë për shkak të mungesës së të penduarit të drejtësisë Luftar Reçit, si edhe mosnjoftimi për gjyqin i Lulzim Berishës dhe Plaurent Dervishajt.
Më 8 dhjetor të 2020, SPAK njoftoi zbardhjen dhe dokumentimin e plotë të 2 ngjarjeve kriminale në operacionin e koduar “Asgjë nuk harrohet” me Reçin që drejtoi gishtin te Lulzim Berisha, Indrit Rusi, Viktor Ymeri, Emiljano Shullazi dhe Imdrit Tallau si personat që organizuan dhe ekzekutuan atentatet.
Me statusin e bashkëpunëtorit të drejtësisë, Reçi, si i përfshirë në të dyja ngjarjet, zbardhi dinamikën e vrasjeve që tronditën vendin në vitin 2005, si dhe përfshirjen në të të ish-kreut të Bandës së Durrësit, Lulzim Berisha, dhe kunatit të tij Plarent Dervishaj, të cilët janë shpallur në kërkim.
Dy ngjarjet kriminale të zbardhura nga SPAK kanë ndodhur në shkurtin e vitit 2005.
Mbrëmjen e 26 shkurtit, Klodian Saliu po udhëtonte në një automjet tip “Mercedes” në aksin Durrës-Maminas, kur nga një automjet në lëvizje u qëllua me breshëri automatiku. Saliu mbeti i vrarë, ndërsa u plagos edhe një person tjetër.
24 orë me vonë, biznesmeni Vajdin Lamaj u vra nga një shpërthimi telekomanduar i një sasie tritoli të vendosur në ashensorin e pallatit të tij pranë stadiumit kombëtar, të quajtur asokohe “Qemal Stafa”.
Përveç tij, i vrarë mbeti edhe Artan Arsi.
