Pep Guardiola ka qenë sot dëshmitar në gjyqin që po zhvillohet në Çester ndaj futbollistit francez Benzhamin Mendi, i cili akuzohet për një sërë krimesh seksuale, mes të cilave 7 përdhunime. Guardiola, i cili ka drejtuar Mendi te Mançester Siti në vitet e fundit, dëshmoi nëpërmjet një lidhej drejtpërdrejt në video pasi nuk gjendej në Angli.
“Ai më kërkoi të jem këtu me ju dhe ja ku jam. Nuk di të them çfarë pritshmërie kishte ai, por si klub dhe unë si trajner, kemi shumë pritshmëri. Ne besojmë te lojtarët tanë. Ai është një lojtar i jashtëzakonshëm”, tha fillimisht Guardiola, i cili foli për periudhën kur kishte afruar fillimisht lojtarin dhe atë të dëmtimeve, teksa u ndal edhe te karakteri i tij.
“Ai është një djalë i mirë, gjithmonë bujar. Mendoj se ishte i lumtur kur ishim bashkë në dhomat e zhveshjeve, të gjithë i kërkonin ndonjë nder dhe ai ishte në gjendje ta kryente.
Mendoj se është një djalë bujar. U përshtat shumë shpejt me skuadrën dhe mendoj se ishte i lumtur që ndihmonte të tjerët. Kur i kërkonim të bënte diçka për shokët e tij në klub, ai ishte në gjendje ta bënte. Ai është një djalosh argëtues dhe mendoj se në fushën stërvitore dhe dhomat e zhveshjeve ai ishte më shumë i lumtur. Them më shumë se në fushë, pasi bënte zhurmë dhe argëtonte njerëzit. Nuk mendoj se ka një person në dhomat e zhveshjeve që mund të flasë keq për të gjatë periudhës që ishim bashkë”, vijoi Guardiola.
Ai më pas foli edhe për jetën që bënte Mendi jashtë fushës. “Unë mund të them se nuk i shoh lojtarët e mi, unë i kontrolloj kur janë në stërvitje, nuk e di se çfarë bëjnë në jetën private. Nuk jam aktiv në rrjetet sociale. Nuk e di se çfarë bëjnë jashtë kontrollit tim në seanca stërvitore dhe palestër. A interesohesha vetëm për atë që bënte në fushë dhe stërvitje? Absolutisht po, nuk jam babai i tij.
Festat kundër rregullave gjatë COVID? Unë e kuptova vetëm pasi ndodhën. Nuk më kujtohet nëse nëpërmjet mediave apo nëse ma tha dikush në klub. Sigurisht, nuk jam i lumtur, ne folëm rreth kësaj dhe ai e pranoi se nuk kishte bërë gjënë e duhur”, shpjegoi Guardiola në këtë lidhje direkt në sallën e gjyqit, ku ishte ftuar si dëshmitar nga i akuzuari.
