Trajneri brazilian, Luiz Felipe Scolari, i cili i udhëhoqi këtë Kombëtare drejt fitores në Kupën e Botës 2002, njoftoi tërheqjen e tij të dielën.
Scolari, i cili mori drejtimin e skuadrës braziliane të Serie A, Athletico Paranaense në fillim të majit, zyrtarizoi gjithçka pas fitores 3-0 kundër Botafogo të dielën në ndeshjen e tyre të fundit të sezonit 2022, pasi përfunduan në vendin e gjashtë në renditje.
“Po tërhiqem si trajner. Unë jam duke emëruar Paulo Turra si teknik i ardhshëm i ekipit tonë dhe unë do të jem drejtor”, tha Scolari për Furacao Live.
74-vjeçari menaxhoi Brazilin në dy raste; fillimisht nga 2001-2002, kur ai e çoi Kombëtaren drejt triumfit të pestë dhe më të fundit botëror, dhe përsëri midis 2012-2014, duke fituar Kupën e Konfederatave 2013.
Në nivel klubesh, Scolari fitoi Copa Libertadores me Gremio në 1995 dhe Palmeiras në 1999, si dhe titullin brazilian të Serie A me të dyja këto skuadra, respektivisht në 1996 dhe 2018.
Ai gjithashtu ka trajnuar Portugalinë (2003-2008) dhe skuadrën e Premier League të Chelsea (2008-2009).
