Doktor Ilir Alimehmeti është një ndër 7 kandidatët që ka hyrë në garën e primareve për të dalë përballë Erjon Veliajt në zgjedhjet e 14 majit për postin e kryetarit të Bashkisë.
“Tirana jonë vuan për administrator, jo për politikan. Politikanë janë bërë të gjithë, të gjithë dinë. Nuk zgjidhim çështjen e trafikut, parkimit se merremi me luftën në Ukrainë”- tha Alimehmeti në një intervistë për “Ditë e Re” në RTV Ora.
Alimehmeti shton se shqiptarët djegin naftën më të shtrenjtë në Europë për të shkuar në punë me makinë, për të marrë pagën më të ulët në Europë.
“Dal në rrugë. Shoh qytetin ku jetoj e ndjej dhimbje për qytetin ku jetoj, gjërat që ka humbur dhe po vuan. Sa të dalësh duhet ti lutesh Zotit që të mund të dalësh nga rrugica me makinë… Shkon në punë me nerva. Duke djegur naftën më të shtrenjtë në Europë, për të marrë pagën më të ulët në Europë. Nëse kjo nuk shkakton dhimbje jemi popull shumë i çuditshëm.
Duhet të përveshim mëngën. Shqipëria nuk bëhet me filozofë.
Kjo Tiranë ka nevojë për administrim, me sytë drejt qytetit dhe jo me sytë drejt kryeministrisë, apo kryesisë së partisë apo aeroplanit”
Kryetari i bashkisë duhet të jetë një person që administron shërbime, ofron shërbime. Politikat i bën pushteti qëndror. Cilësia e ajrit nuk pyet fare se i kujt parti je”- tha Alimehmeti.
