Kryebashkiaku i Shkodrës Bardh Spahia, njëherazi anëtar i Kryesisë së PD, u shpreh gjatë fjalës së tij në podiumin e protestës, se era e ndryshimit po fryn në të gjithë Shqipërinë.
Spahia tha se protestat për largimin e Edi Ramës nuk duhet të ndalen deri në dorëheqjen e kryeministrit.
“E nisëm me Shkodrën, por tashmë era e ndryshimit po fryn në të gjithë Shqipërinë. Sot është një ditë e bukur lirie. Ne nuk do ta lëmë me kaq, protesta jonë do të jetë e pandalshme deri ditën që kryeministri të japë dorëheqjen. Ne kemi fituar një betejë. Qeveria ka frikë nga ne, ka frikë nga ju. Ata bëjnë gjithçka vetëm për pushtetin dhe pasurimin e vet. Ata duan të na shohin të ndarë, por ne jemi sot këtu të bashkuar. Ne do të fitojmë për fëmijët tanë, për familjet tona, për atdheun tonë”, u shpreh Spahia.
