Mendja e presidentit amerikan Joe Biden duket se është “stakuar” në vitin 2004 atëherë kur lufta e Irakut prodhoi në Fallujah një nga betejat më të përgjakshme.
Të paktën këtë të lë të kuptosh gafa e radhës e Biden, i cili teksa ishte duke komentuar luftën në Ukrainë dhe tërheqjen e trupave ruse nga Khersoni tha se “ata po largoheshin nga Fallujah”.
Biden çuditërisht nuk mund të mbante mend se nga cili qytet po tërhiqej ushtria ruse në Ukrainë, por e korrigjoi veten shpejt teksa dëgjoi anëtarët e stafit që i thoshin Kherson nga pas.
Deklarata e tij vjen pasi udhëheqësi i ushtrisë ruse njoftoi se forcat do të tërhiqen nga një prej qyteteve të vetme të mëdha që ata pushtuan që nga fillimi i luftës.
Gjenerali Sergei Surovikin u urdhërua nga ministri i Mbrojtjes Sergei Shoigu që të tërhiqte njerëzit e tij përtej lumit Dnipro dhe t’u dorëzonte Kherson-in ukrainasve në një lidhje live në televizionin kombëtar rus.
Surovikin dha një raport në të cilin ai tha se trupat e tij janë në rrezik dhe civilët po vriten, përpara se të rekomandonte një tërheqje, të cilën Shoigu e pranoi.
