Ish-deputeti i Partisë Socialiste Alqi Bllako është rikthyer sërish sot në qelinë e burgut, një muaj pasi gjyqtarja e Gjykatës së Posaçme Irena Gjoka pranoi kërkesën për vendosjen e masës “arrest në shtëpi” lidhur me çështjen e aferës së inceneratorëve.
Pas ankimimit nga SPAK të vendimit, Apeli i GJKKO pranoi sot kërkesën duke e rikthyer Bllakon e dyshuar për shpërdorim detyre dhe një lumë akuzash të tjera në burg.
Ish-deputeti ishte i pranishëm këtë në seancë së bashku me avokatin e tij kur gjyqtarja Ilirjana Olldashi shqiptoi vendimin, ndërsa ata kishin kërkuar që të mbetej në fuqi masa e caktuar më herët “arrest shtëpie”.
Ky pretendim i Bllakos nuk është marrë në konsideratë, pasi SPAK kishte kërkuar ashpërsim të masës së sigurisë duke argumentuar se ka prova e fakte që Bllako po përgatiste largimin jashtë vendit.
Gjithashtu sipas News24 organi i akuzës kishte dyshime të forta se ish-deputeti mund të ndikojë në prishjen e provave dhe të ndërhynte te drejtësia.
GJKKO e ka marrë parasysh apelin e SPAK dhe aktualisht Bllako ndodhet në ambientet e brendshme të gjykatës.
Sakaq, forcat e policisë janë në seancë dhe Bllako në shoqërinë e avokatit të tij po pret daljen e urdhrit të ekzekutimit nga prokurori, ndërsa më pas do shoqërohet në ambientet e paraburgimit.
