Një grevë e paprecedentë që ka përfunduar në përplasje fizike, dhunë dhe zjarre ka ndodhur në kampin më të madh të emigrantëve në Britaninë e Madhe, ku qindra shqiptarë presin të shqyrtohet kërkesa e tyre për azil ose avionin për t’u deportuar drejt Tiranës.
Sipas DailyMail incidentet ndodhën mbrëmjen e së premtes, ku në qendrën më të madhe të emigracionit në Britani, pranë aeroportit të Heathrow shpërtheu një epidemoni.
Në mungesë të energjisë elektrike dhe ujit përreth 17 orë, emigrantët e vendosur aty në errësirë që parashikohet të largohen nga Britania nisën të thyenin mobiljet duke i plasur në dysheme dhe mure.
Ata përdorën tavolina dhe karrige për të ndezur zjarre në oborrin e stërvitjes dhe i kthyen ato në armë për të luftuar njëri-tjetrin.
“Gjatë trazirave në qendrën “Harmondsworth” në perëndim të Londrës, stafi u mbyll në zyra. Brenda kampit për të dëbuarit shqiptarë, indianë, vietnamezë, afrikanë dhe algjerianë u shkatërrua pothuajse gjithçka”, shkruan media angleze.
Në një zonë induksioni të mbyllur për shqiptarët, ka ndodhur një trazirë e ngjashme e dhunshme.
“Siç mund të zbulojmë për herë të parë, qendra – objekti më i madh i dëbimit në Evropën Perëndimore – ishte pa energji nga mesnata e së enjtes deri të shtunën në mëngjes, pa drita apo ujë, pa energji elektrike për gatim apo ngrohje. Tualetet dhe dushet nuk funksiononin. Ndërprerja e energjisë elektrike u shkaktua nga një ‘ndërprerje’ në zonën West Drayton”, sqarohet më tej.
Pasi u pyetën për ndërprerjen e energjisë dhe trazirat të premten në mbrëmje, burime qeveritare i thanë Daily Mail se po e ekzagjeronin për trazirat, por sipas të burgosurve e vërteta është se ato nisën nga mungesa e energjisë elektrike dhe ujit brenda Harmondsworth.
Një 27-vjeçar shqiptar, i cili mbërriti me gomone në fillim të verës si emigrant ekonomik dhe tani është në pritje të deportimit për në Tiranë, tha: “Ishte një situatë e tensionuar. Kishte gjithashtu staf shumë të shqetësuar. Ne nuk mund të përdornim as tualetet. Kur erdhi nata të premten, ne po endeshim në errësirë. Askush nuk mund të shihte asgjë në korridore apo vendet e ndenjjes. Askush nuk dukej se dinte çfarë të bënte. Pati një shpërthim masiv. Ishte e rrezikshme”.
Një emigrant 44-vjeçar (pa shtetësi), i cili kishte jetuar në Britani për vite përpara se të deportohej në Belgjikë, Gjermani dhe Francë vetëm për t’u kthyer dy herë me gomone e ka mbajtur të informuar median orë pas ore për ngjarjet.
Burri, një azilkërkues që DailyMail e ka quajtur Amir u largua nga kampi ditën e djeshme së bashku me qindra të tjerë nga policia e trazirave pasi objekti u mbyll për 36 orë.
Ai tha: “Energjia u ndërpre mesnatën e së enjtes. Të gjithë e duruan këtë gjë në fillim. Vetëm kur u errësua të premten gjërat u bënë keq. Pati një shpërthim. Askush nuk mund të shihte asgjë brenda. Njerëzit filluan t’i kapte paniku. Stafi dukej i tmerruar. Ne kishim 16 ose 17 orë pa ujë, as tualete, as ushqim të gatuar, as dritë, as televizor. Emigrantët po zemëroheshin. Stafi nuk e dinte se cili ishte problemi”.
“Shkova në dhomën time në orën nëntë të mbrëmjes të premten, sepse mund të ndjeja se problemet po krijoheshin. Më pas dera u mbyll për natën siç është normale nga stafi i sigurisë, por jashtë filluan zjarret. Ulërimat vazhdonin. Atë natë gjërat dolën jashtë kontrollit. Kampi u copëtua. Blloku i induksionit ishte gjithashtu nën sulm. Ka pasur përleshje mes grupeve, kryesisht shqiptarë e të tjerë. Zhurma ishte e pabesueshme”, shtoi ai.
Të shtunën, kur u rikthyen energjia dhe uji, mbërritën edhe oficerët specialistë.
“Unë pashë policin e armatosur për të kontrolluar trazirat. Jashtë dritares sime ishin 70 prej tyre. Ata morën njerëz me autobusë me eskortë policie”, rrëfeu emigranti.
Ministri i Zyrës së Brendshme, Robert Jenrick, tha se protestuesit do të “vihen para përgjegjësisë” dhe do të deportohen. Ai premtoi se i gjithë vendi në Harmondsworth do të pastrohej deri të shtunën mbrëma pas trazirave, por kjo nuk ndodhi.
Burimi: DailyMail/ Përshtati: Boldnews.al
