Kreu i Partisë Demokratike, Sali Berisha në konferencën e sotme për mediat ka prekur edhe çështjen e sigurisë në portin e Durrësit, duke nisur nga sekuestrimi i 32.5 kg kokainë në kontejnerët me banane që ishin porositur nga “BanaKing” e Trifon Murataj.
Duke nënvizuar se porti është kthyer në një pikë kyçe për trafikun ndërkombëtar të kokainës, Berisha akuzoi kryeministrin Edi Rama si përgjegjës duke e lidhur problemin edhe me hakerimin e sistemit TIMS.
“Është vetë Edi Rama dhe ministrat e atij që zhdukën çdo kontroll. Për 6 muaj rresht Porti i Durrësit u la jashtë çdo kontrolli, zbarkuan në Durrës tonelata me kokainë, ku shkuan? Shkruan drejt Evropës dhe jo drejt hënës. Porti është shndërruar në portin më të madh të kokainës në botë. Edi Rama përpiqet që t’i mbulojë këto me sharje ordinere, me sulme të një njeriu si ai. Dënoj këto qëndrime dhe deklaroj me përgjegjësi të plotë se shkak më madh i të gjitha këtyre është Rama. PD do të aplikojë zero tolerancë ndaj krimit të organizuar. PD do të jetë, do të zbatojë ligjin jo vetëm ndaj bandave në strofullat ku jetojnë, por dhe ndaj bosëve të tyre”, tha Berisha.
