Një oficere policie e përshkruar nga mediat britanike si “magjepsëse dhe mbretëreshë e bukurisë” është përjashtuar nga Metropolitan Police pasi një fermë kanabisi dhe drogë e klasit A (kokainë) u gjet në shtëpinë dhe në adresën e saj të mëparshme.
Oficerja 47-vjeçare Rasvinder Agalliu, e cila është bashkëshortja e shqiptarit Julian Agalliu të arrestuar bashkë me 750 persona të tjerë pas “çmontimit” të serverëve të telefonave të kriptuar, u arrestua me dyshimin për komplot për furnizimin me drogë pasi policia kontrolloi dy banesat e saj në Londër në vitin 2020.
Agalliu ka shërbyer në policinë britanike për gati 20 vjet dhe i ishte bashkuar Policisë Metropolitane në moshën 17-vjeçare, ndërsa u pushua përfundimisht për sjellje të pahijshme të martën.
Largimi i saj vjen pasi një raport nga mbikëqyrësi kryesor i policisë, i publikuar dje, zbuloi se qindra, nëse jo mijëra, oficerë të korruptuar mund të shërbejnë në forcat e policisë së Anglisë dhe Uellsit.
Ndërkohë sa i përket bastisjes së shtëpisë së saj, gjithçka ndodhi më 25 qershor 2020, ndërsa më 25 tetor të atij viti oficerët e policisë ekzekutuan edhe një urdhër bastisje në një ish-adresë të Agalliut.
Atje ata sekuestruan sende si jelek antiplumb, pranga, uniforma dhe një sërë shkresash rasti dhe disqe intervistash në lidhje me hetimin e një vepre penale nga Agalliu.
Paneli për sjellje të pahijshme gjeti gjithashtu se ajo ka shkelur standardet e forcës për respektimin e ndershmërisë dhe integritetit, sjelljen diskredituese, detyrat dhe përgjegjësitë, urdhrat dhe udhëzimet.
Kryeinspektori Owain Richards i Njësisë së Komandës Qendrore Perëndimore tha: “Veprimet e kësaj oficereje ishin një shkelje e rëndë e besimit që iu dha asaj nga njerëzit e Londrës. PC Agalliu me të drejtë është shkarkuar dhe nuk ka vend për të në polici. Ne jemi të vendosur të largojmë çdo oficer që nuk arrin të përmbushë standardet tona dhe të sigurojmë që ata të mos mund të punojnë më kurrë në zbatimin e ligjit”.
Ndërkohë, Agalliu, e cila është nëna e tre fëmijëve merr pjesë në konkurset e bukurisë dhe pretendon se është instruktore fitnesi, ndërsa nuk e ka mohuar se ‘ëndërron’ të marrë pjesë në filma apo botën e televizionit.
Në një nga profilet e saj të modelingut, Agalliu ka shkruar: “Një histori e shkurtër për mua. Unë kam qenë një oficere policie për 17 vjet. Unë jam një lloj gruaje që më pëlqen të krenohem me pamjen time dhe të vendos make up çdo mëngjes, gjë që më motivon vërtet për ditën“.
Sa i përket bashkëshortit të saj, Julian Agalliu u arrestua në Hadley Wood, afër Enfield, në veri të Londrës ndërsa mbi të rëndon akuza e trafikut të kokainës.
Në kontrollin e bërë në shtëpinë e tyre iu gjetën edhe 10 mijë paund cash.
Burimi: DailyMail
