Një furgon i ngarkuar me drogë që vinte nga kufiri i gjelbër me Shqipërinë është sekuestruar nga policia helene në Janinë, në vendin e quajtur Miliotadho.
Autoritetet greke kanë gjetur brenda mjetit 85 pako që përmbanin 374 kg 850 gramë marijuanë dhe kanë vënë në pranga shoferin e furgonit, një 28-vjeçar shqiptar.
Mjeti rezulton i vjedhur në Athinë në korrik të vitit 2020, ndërsa gjatë kontrolleve në zonë, në vendin e quajtur Anthrakiti, është ndaluar një automjet dhe është arrestuar drejtuesi grek 60 vjeçar i cili kontrollonte zonën duke i bërë të mundur kalimin furgonit.
Sakaq, përveç drogës, janë konfiskuar edhe pesë aparate celularë, një shumë parash dhe automjetet e mësipërme ndërsa të arrestuarit do të dërgohen në Prokurorinë e Janinës.
