Në mesin e mijëra emigrantëve shqiptarë që ndodhen aktualisht në kampet dhe qendrat e pritjes së azilkërkuesve që mbërrijnë në Britaninë e Madhe me gomone, autoritetet vendase kanë hasur edhe në një 31-vjeçar, i cili ka qenë i dënuar më parë për vrasje.
Sipas mediave lokale në Kent, Mariglen Shoshari ishte në mesin e atyre që u dërguan në qendrën e përpunimit Manston muajin e kaluar, pasi kishte mbërritur në ishull me gomone përmes Kanalit.
Ai u dërgua në ish-godinën e Ministrisë së Mbrojtjes në Thanet, që është kthyer në një qendër përpunimin e azilkërkuesve, ku rrëfeu vetë para autoriteteve se ishte dënuar për vrasje dhe krime me armë zjarri në Greqi në vitin 2012.
Shoshari rrëfeu gjithçka kur iu kërkua të plotësonte një pyetësor që u ishte dhënë të sapoardhurve.
Sipas dëshmisë së 31-vjeçarit ai ishte dënuar me 18 vjet e gjysmë burg, ndërsa kishte kryer 8 vite e 7 muaj.
Si rezultat i asaj që ai pranoi në pyetësor, autoritetet e imigracionit e akuzuan atë për mbërritjen në Mbretërinë e Bashkuar ilegalisht. Pas më shumë se tre javësh në paraburgim për emigracionin, Shoshari u paraqit në Gjykatën e Magjistraturës Folkestone të mërkurën dhe u deklarua fajtor për veprën penale.
Prokurorja Julie Farbrae u tha gjyqtarëve që Shoshari kishte mbërritur në anijen e vogël më 10 tetor me të tjerë dhe u dërgua në Manston për përpunim.
Ajo shtoi: “Ai u soll në breg dhe u konfirmua se ishte shtetas shqiptar. Në Manston atij iu kërkua të plotësonte një pyetësor azili ku ai konfirmoi se ishte arrestuar në Greqi dhe akuzuar për vrasje dhe krime me armë zjarri. Ai tha se ishte dënuar me 18 vjet e gjysmë, por kishte kryer tetë vjet e shtatë muaj. Ai nuk ishte piloti i varkës”.
Gjyqtari Mark Tucker pyeti prokurorin pse të tjerët në të njëjtën varkë nuk ishin akuzuar për të njëjtën vepër të hyrjes ilegalisht dhe Farbrace u përgjigj: “Të gjithë në varkë mund të akuzohen për shkeljen, por kjo nuk ndodh për momentin. Por mund të ndodhë në të ardhmen“.
Gjykata dëgjoi gjithashtu se Shoshari kishte aplikuar për azil në Britani më 12 tetor dhe se kërkesa e tij do të vazhdonte dhe se ai kishte qenë në paraburgim emigracioni për 23 ditët e fundit.
Avokatja që e mbrojti tha: “Ai ka qenë i hapur dhe i sinqertë me autoritetet në dëm të tij. Teksa ishte në Manston ai aplikoi për azil më 12 tetor dhe kjo do të vazhdojë. Ai i kërkon falje gjykatës”.
Magjistratët vendosën ta burgosnin Shosharin me 60 ditë për veprën penale dhe urdhëruan që ai të paguajë një shtesë prej 154 £ pas lirimit.
