Pamjet e rënda të xhiruara brenda shtëpisë së të moshuarve në Pejë kanë shkaktuar reagime të forta në Kosovë dhe Shqipëri, ku të gjitha reagimet dënojnë dhunën e paprovokuar të infermieres Aurona Pelaj ndaj një zonje të pambrojtur, por edhe neglizhencën e kolegeve të saj.
Infermierja shihet duke goditur të moshuarën në fytyrë, pjesë të trupit dhe në kokë e pa shqetësuar aspak, ndërsa koleget e saj Altina Rexhepi dhe Ramzije Kuqi shihnin skenën duke qeshur dhe e filmonin pa ndërhyrë.
Ngjarja ka ndodhur në qendrën “Orenda”, dhe pas publikimit të videos Bordi i Qendrës për Përkujdesjen e të moshuarve ka marrë vendimin për pushimin nga puna për katër infermieret e përfshira në këtë ngjarje të rëndë.
Ndërkohë, policia veproi menjëherë duke arrestuar dy prej infermiereve. Por , pavarësisht aktit të rëndë të tyre duket se bashkëshorti i njërës prej infermiereve nuk e ka pranuar prangosjen e saj duke kërcënuar pronarin e qendrës “Orenda”, Anton Rasaj.
Nisur nga ky kërcënim ai është shoqëruar nga Policia e Kosovës dhe është marrë në pyetje, për t’u lënë më pas i lirë.
