Një shpërthim me lëndë plasëse ndodhi mbrëmjen e djeshme (e Martë) në një shtëpi private në Lushnje. Në këtë banesë jeton Altin Lamçe, tregtar në tregun e fruta perimeve të Lushnjes.
Mësohet se banesa është në pronësi të kunatit të Lamçes, Arben Turku, i cili është në emigrim në Angli.
Lënda plasëse dyshohet se u hodh nga rruga drejt oborrit të shtëpisë, nga një makinë në lëvizje. Nga shpërthimi u thyen xhamat dhe dyert e shtëpisë. Dëme pësuan po ashtu edhe dy makina që ishin të parkuara në oborr.
Në banesë jetojnë 5 persona, çifti Lamçe me dy fëmijët e mitur 12 dhe 15 vjeç dhe nëna 77-vjeçe.
Altin Lamçe nuk rezulton të jetë person me precedentë penal.
Policia po punon për zbardhjen e ngjarjes dhe identifikimin e autorëve. Ndërkohë po shihen edhe kamerat e banesave të lagjes.
Deri tani nuk ka pista dyshimi për hakmarrje apo konflikt të mundshëm me persona të tjerë.
