Ditën e sotme i burgosuri Erion Alibej ka refuzuar për të dytën herë për të dëshmuar kundër dy bashkëpunëtorëve të tij.
Sot ishte parashikuar që ai të jepte dëshminë e tij në Gjykatën e Posaçme, por Alibej nuk ka pranuar sërish të flasë.
Arsyetimi i Alibejt për të mosdëshmuar ishte me pretendimin se po kalon një gjendje jo të mirë shëndetësore.
Kujtojmë se Alibej akuzohet si organizator dhe urdhërues i disa vrasjeve të ndodhura në Elbasan.
Më herët Alibej kishte dhënë pëlqimin e tij për t’u marrë në pyetje në gjykimin që po zhvillohet ndaj 2 të pandehurve Xhulian Hoxha e Euglent Halili, të cilët akuzohen për vrasjen e Emiljano Ramazanit dhe Regis Runajt.
Ata kanë pretenduar se të dy vrasjet në fjalë i ka urdhëruar Alibej, për t’u hakmarrë për vrasjen e të vëllait, Endrit Alibej, xhaxhait të tij, Arben Dylgjerit dhe një shtetasi turk, ngjarje të ndodhura në vitin 2018.
Kujtojmë se Euglent Halili ka statusin e të penduarit të drejtësisë, ndërsa pas dëshmisë së Dumanit, SPAK vendosi që të tërhiqte dosjen për Alibejn, duke thënë se kanë dalë fakte të reja për këtë çështjes dhe se duhet të hetohen.
