Emri i Kevin Zenelit, i cili doli në dritë pas arrestimit dhe më pas “zbërthimit” të dy vëllezërve Indrit dhe Gentian Beqiraj, të cilët me dëshminë e tyre çuan pas hekurave një bandë kriminale prej 15 personash që vepronte në Durrës, ka nisur të merret seriozisht nga autoritetet belge.
Mësohet se belgët i janë adresuar zyrtarisht policisë shqiptare me një letërporosi për krahun e djathtë të Kasandër Nogës (alias Kevin Suçi), ku kërkojnë informacion lidhur me aktivitetin e tij kriminal në vend dhe Europë.
Belgjika e kërkon Zenelin pasi ka dyshime se është ai autori i atentatit të ndodhur në qershor të ktij viti në qendër të Brukselit, që la të plagosur Erion Hasanbelliun, i cili është “armiku” kryesor i Kasandër Nogës.
Autoritetet atje gjithashtu kanë dyshime të forta se ai fshihet në Shqipëri.
E gjithë saga e krimeve ka nisur në vitin 2000 kur Kasandër Noga hyri në Sanatorium, ku pasi i hoqi serumet nga krahu vrau me automatik Aqif Hasanbelliun, babain e Erionit dhe Dritan Hajdinin, shok i vëllait të tij Geronit, të cilët ndodheshin të shtruar aty.
Hakmarrja vazhdoi me një seri ngjarjesh pasi Erion Hasanbelliu bashkë me vëllain e tij Geron Hasanbelliu ekzekutuan Julian Çelën dhe plagosën rëndë Kasandro Nogën në 2002, në Antverp të Belgjikës, ndërsa vetë Noga akuzohet për 5 vrasje dhe disa plagosje në këtë shtet.
Sa i përket Kevin Zenelit ai jihet si “ushtari” kryesor i Nokës dhe miku më i besuar i tij, i cili ka dijeni për të gjitha atenatet që 44-vjeçari i shumëkërkuar ka porositur si në Shqipëria dhe në Europë.
Vëllezërit Beqiraj zbuluan në rrëfimet e tyre se ishte pikërisht Zeneli ai që zbrazi kallashnikovin mbi tavolinën e lokalit në Don Bosko ku ishin ulur 5 persona dhe mbeti i vrarë Erion Çela, 35 vjeç dhe u plagos vëllai e daja i tij, por edhe kamarieri e një person tjetër.
Në këtë atentat “killeri” ngatërroi objektivin që supozohet të ishte Geron Hasanbelliu, siç ai ishte porositur nga Kasandër Noga.
Për atë vrasje dy vëllezërit Beqiraj ishin rekrutuar nga Zeneli për ta kryer, por në fund nuk kishin rënë dakord dhe i besuari i Nogës e mori vetë përsipër, ndërsa Indriti dhe Gentiani e kanë ndihmuar për tu larguar jashtë shteti.
Po ashtu Kasandër Noga ka porositur nëpërmjet Kevin Zenelit dhe vrasjen e Arben Manecit (Mërkuri) në Durrës në maj të këtij viti.
Për t’i kryer këto vrasje, sipas dëshmisë së Indrit Beqiraj ai është paguar nga Kasandër Noga nga 50 mijë deri në 150 mijë euro. Zeneli është i shpallur në kërkim në kuadër të operacionit policor të koduar “Porositësi”.
