Policia federale e Argjentinës arrestoi një udhëheqës të mafies italiane në periferi të Buenos Aires, sipas njoftimit të autoriteteve në një deklaratë të hënën, duke i dhënë fund një “gjuetie” prej vitesh.
Carmine Alfonso Maiorano, 68-vjeç, udhëheqës i mafies italiane ‘Ndrangheta, u kap të mërkurën e kaluar në qytetin Guernica në provincën e Buenos Aires, thuhet në deklaratë. Maiorano me origjinë italiane është akuzuar nga autoritetet ndërkombëtare për kryerjen e operacioneve të trafikut të drogës dhe armëve midis Amerikës Latine dhe Evropës.
Ndrangheta’ konsiderohet nga “Interpol” si një nga organizatat kriminale më të gjera dhe më të fuqishme në botë.
Një urdhër-arresti ndërkombëtar u lëshua për Maioranon në vitin 2015 dhe Interpoli filloi një përpjekje në vitin 2020 për të koordinuar përpjekjet ndërkombëtare për të shuar grupin kriminal.
Mafia ‘Ndrangheta’ u vendos në Argjentinë disa vite më parë, thuhet në deklaratën e policisë, duke vepruar së bashku me shqiptarët në Evropë. I arrestuari është vënë në dispozicion të Gjykatës Federale Penale dhe Korrektuese të Argjentinës.
