“Një kryetar bashkie në Jug të vendit është përdorues droge!”.
Ky ishte denoncimi që eksperti i kriminalistikës Ervin Karamuço bëri sot, teksa ka komentuar zbulimet e mediave në ditët e fundit për rritjen e numrit të përdoruesve të drogave në vend dhe shtimin e pikave të shpërndarjes së tyre në kryeqytet.
“Në jug të Shqipërisë, një kryetar bashkie në jug të Shqipërisë, përdor droge, kokainë, ka krijuar shqetësime emocionale të personalitetit, të cilat janë verifikuar dhe nga vartësit e tij’, prandaj duhet që patjetër të merren masa për administratën shtetërore, rojet, sinjalizuesit publikë duhet ti kemi edhe për këtë aspekt”, tha Karamuço teksa adresonte problemin.
Sipas profesorit të njohur në vendin tonë është rritur shumë numri i përdoruesve që arrestohen, nga 17 deri në 21 vjeç dhe kjo ndodh se “ata nuk e projektojnë veten për të qenë shpërndarës, por ngelen debitorë”.
Sipas tij kërkesa është rritur me rreth 40- 50%, dhe të rrezikuarit kryesor janë shkollat, por edhe administrata publike shqiptare.
Karamuço theksoi më tej se drogat janë kthyer në rrezik për shkollat por dhe për administratën publike shqiptare, ndaj sipas tij punonjësit e Administratës duhet të testohen në mënyrë të rregullt, siç ndodh në SHBA apo në vende të tjera perëndimore.
“Jemi përplasur fort, me struktura të veçanta të policisë së shtetit. Por, nuk dimë se çfarë bëhet me administratën tjetër shtetërore atë civile”, deklaroi ai për ABC.
