Një përdhunim i ndodhur në Paleo Faliro të Greqisë është zbardhur nga autoritetet vendase dhe i akuzuar për ngjarjen është një shtetas shqiptar.
Mediat greke raportojnë se pasi përdhunoi viktimën ai tentoi të sulmonte një grua tjetër, ndërsa aktualisht bëhet me dije se është arratisur dhe fshihet në Shqipëri.
45-vjeçari shqiptar raportohet të jetë i divorcuar dhe jetonte ne Greqi me nënën e tij. Ndërkohë, nga Greqia pritet të lëshohet një urdhër arresti ndërkombëtar për arrestimin dhe ekstradimin e tij drejt shtetit helene.
Zbulimi i shqiptarit erdhi pasi një grua 34-vjeçare kishte denoncuar se e kishin përdhunuar në një stacion autobusi.
Në të njëjtën zonë, një tjetër grua, 24 vjeçe, u ankua se ishte sulmuar për ta përdhunuar, ngjarje e ndodhur pak para përdhunimit të 34-vjeçares.
Dy femrat dhanë përshkrime të njëjta për autorin dhe i referoheshin një personi që flet mirë greqishten, me gjatësi mesatare, flokëshkurtër me një tatuazh në krahun e djathtë.
Përshkrimet ndryshonin për atë se çfarë kishte veshur burri (24-vjeçarja tha se kishte veshur një xhup dhe këpucë të bardha, ndërsa 34-vjeçarja foli për veshje të errëta dhe atlete të zeza), por veshja mund të kishte ndryshuar brenda tre orëve mes një sulmi ndaj tjetrit.
