Një 33-vjeçar shqiptar ka rënë në prangat e policisë italiane, duke çuar kështu në finalizimin e një operacioni vëzhgimi që zgjaste prej kohësh.
Mediat vendase raportojnë se shqiptari me banim në Pistoia u ndalua në unazën veriore të Pratos dhe në bagazhin e makinës iu gjetën dy thasë me 18 mbështjellës celofani të mbyllura me nxehtësi, që kishin brenda marijuanë me një peshë totale rreth 10 kilogramë.
Po ashtu, me vete 33-vjeçari kishte edhe 1800 euro cash, nga të cilat nuk ka dhënë arsyetime se ku i kishte siguruar, ndaj dhe mendohet se ishin të ardhura nga veprimtari të paligjshme.
Në momentin e ndalimit shqiptari ka tentuar që të arratiset duke i dhënë gaz mjetit, por është përplasur me makinën e Policisë duke çuar në dështimin e planit.
Mësohet se ai është një emër i njohur për policinë italiane, pasi ka qenë i dënuar disa herë për trafik droge në të shkuarën e tij.
