Pablo Mari, mbrojtësi i Monzës, është qëlluar sot me thikë ndërsa ndodhej me familjen e tij në një supermarket nga një person i cili ka goditur edhe persona të tjerë të pranishëm. Adriano Galiani, administratori i klubit të Serisë A, ka shpjeguar atë që ka ndodhur dhe situatën në të cilën gjendet mbrojtësi i shtruar në spital.
“Për fat të keq kam marrë një lajm të tmerrshëm, ka humbur jetën arkëtari i dyqanit. Sa i përket Pablo Marit, ka pësuar një plagë mjaft të thellë në shpinë. Një plagë shpuese e cila për fat nuk ka prekur mushkëri apo organe të tjera jetësore. Nuk është në rrezik jete, sigurisht ka probleme por duhet të rikuperohet shpejt, pavarësisht ndonjë muskuli të dëmtuar. Është i ndërgjegjshëm, po e qepin plagën, këto janë lajmet që vijën nga infermieret”, tha Galiani për mediat italiane,.
Galiani ka shkuar në spital të mësojë për situatën e futbollistit bashkë me trajnerin Padalino. Ndërkohë, ekipit i ishte ndaluar ta bënte një gjë të tillë sepse do të kishin probleme me mbipopullimin e zonës së pritjes të familjarëve.
