Vetëm pak ditë më parë në media qarkulloi lajmi se Ibrahim Lici, i shumëkërkuari i policisë që akuzohet për vrasjen e Endri Mustafës dhe një sërë ngjarjesh kriminale në Shkodër, ishte arrestuar në Turqi.
Sipas lajmit që qarkulloi gjerësisht, Lici kishte fluturuar në drejtim të Stambollit nga aeroporti i Prishtinës në 24 korrik 2021 dhe është arrestuar në 19 tetor te ketij viti.
Por, vetë Lici ditën e sotme hodhi poshtë zërat për arrestimin, duke deklaruar se ai gëzon liri të plotë.
Lici ka hedhur poshtë edhe dyshimet e ngritura ndaj tij për vrasjen e Endri Mustafës duke deklaruar se kamerat e sigurisë dhe qelizat telefonike vërtetojnë sipas tij se ka qenë në Tiranë në momentin e vrasjes.
“Unë pres vendimin e gjykatës për të zbardhur ngjarjen dhe për të çuar përpara drejtësisë autorët e vërtetë. Edhe për vrasjen e vëllezërve Bilali nuk kam qenë asnjëherë nen hetim nga prokuroria dhe jam shpallur në kërkim nga policia, pra në kërkim policor si person për t’u marrë në pyetje vetëm se nuk jam gjetur në banesë. Nuk kam pasur asnjëherë konflikt me vëllezërit Bilali. Shumë e çuditshme të kërkohet ekstradimi im në një kohë që nuk jam arrestuar dhe i bëj thirrje policisë të dalin në deklaratë se ku dhe kur më ka arrestuar sepse unë jam i lirë dhe në pritje të drejtësisë. Jetoj i lirë në Turqi dhe pres të zbardhet ngjarja”, thuhej në një deklaratë të shpërndarë për mediat nga i riu.
Për vrasjen e Endri Mustafës, është dënuar me 10 vite burg 16-vjeçari Ergys Malja, i dënuar për akuzën e “Vrasjes me paramendim kryer ne bashkëpunim”.
Emri i Ibrahim Licit si autor dyshohet se doli nga dëshmia e Ergys Maljas para grupit hetimor, pasi pak ditë pasi u arrestua, ai akuzoi Ibrahim Licin si autor të vrasjes.
Ndërkohë, faktin se Lici është i lirë në territorin e Republikës së Turqisë duket se e provon edhe një foto e tij , e publikuar rishtazi ku shfaqet në krah të të vëllait Muhamet Lici, ku në sfond kanë urën e famshme të “Bosforit”.
