Tre ditë më parë Agjencia e Mbikëqyrjes Policore nisi një hetim ndaj Shefit të Krimeve në komisariatin e policisë në Devoll, pasi dyshohej për “kryerje të veprimeve arbitrare”.
Pashk Syziu u pezullua përkohësisht nga detyra për 3 ditë dhe pritej që sot të vendosej për rikthimin e tij ose jo në punë.
AMP duket se ka provuar akuzat e ngritura ndaj Syziut prej 34-vjeçarit Marsel Buçi, i cili tha për mediat se shefi i krimeve e ka goditur në zyrë, teksa merrej në pyetje lidhur me çështjen e vajzës problematike Deizi Arapi.
Kjo pasi, pas 72 orësh hetime Drejtori i Përgjithshëm i Policisë, Muhamet Rrumbullaku ka njoftuar mediat se ai ka vendosur të përjashtojë përgjithmonë Syziun nga radhët e Uniformave Blu.
“Drejtori i Përgjithshëm i Policisë së Shtetit, në përmbushje të një prej prioriteteve të punës, për largimin nga radhët e Policisë së Shtetit, të cilitdo që abuzon me detyrën, bazuar në hetimet e kryera nga Drejtoria e Standardeve Profesionale e Policisë së Shtetit ka marrë disa vendime për punonjës policie, në disa qarqe të vendit: –Komisar P. S., me detyrë Shef i Krimeve i Komisariatit të Policisë Devoll, është përjashtuar menjëherë nga Policia e Shtetit, për shkelje të Kodit të Etikës së Punonjësit të Policisë së Shtetit gjatë përmbushjes së detyrës, pasi është konstatuar në paligjshmëri administrative me detyrat funksionale të punonjësit të Policisë së Shtetit dhe ka kryer veprime arbitrare, në tejkalim të kompetencave ligjore, gjatë trajtimit të një çështjeje”, thuhet në njoftimin e zyrës së shtypit.
Ndërkohë, kujtojmë se në dëshminë e tij 34-vjeçari Buçi shprehej se shefi i krimeve në gjendje të dehur e ka dhunuar brenda ambienteve të komisariatit.
“Atje, në zyrën e shefit të krimeve, ku ishte prezent edhe një punonjëse policie, shefi i krimeve pa asnjë shkak më ka goditur në pjesë të ndryshme të trupit me grushte dhe shkelma. Nuk kam reaguar dhe kam qëndruar i qetë derisa hyri në zyrë një tjetër punonjës policie i cili e qetësoi situatën. Më pas shkoj te Drejtoria e Policisë dhe bëj denoncimin në AMP”, tha Marsel Buçi për mediat tre ditë më parë.
I riu sqaroi të gjithë ngjarjen duke thënë se burimi i përplasjes me Pashk Syziun ishte vajza e njohur si “gangsterja” e Bilishtit, Deizi Arapi, e cila ka një histori me djegien e makinave.
E pranishme në komisariat gjatë momentit të dhunimit ishte dhe Arapi e cila sipas Buçit po qeshte. Ndër të tjera 34-vjeçari deklaroi se ndihej i kërcënuar për jetën.
“Mbrëmë kam dalë për kafe dhe jam konfliktuar me fjalë me Deizi Arapin, e cila me ka kërcënuar dhe provokuar që unë ta godisja por nuk kam reaguar. Pas debatit më njoftuan nga familja që policia po më kërkonte në shtëpi, erdha në banesë dhe më shoqëruan në komisariat. Ndihem i kërcënuar, jam shumë i prekur nga kjo situatë dhe ndihem i pasigurt dhe jo i qetë. Në komisariat mbrëmë mbërriti edhe avokati im, dhe deputeti i Bilishtit Bledjon Nallbati”, u shpreh ai.
