Pedagogu Lush Susaj ka folur për mediat nga protesta e e zhvilluar sot para Universitetit Politeknik të Tiranës duke shprehur shqetësimin e tij për mënyrën sesi qeveria po përpiqet t’i japë fund bojkotit të tyre nëpërmjet presioneve dhe shantazheve.
Sipas Susajt është tentuar që të ndalohet protesta e sotme, pasi në bordet e çdo universiteti janë thirrur mbledhje në mënyrë që pedagogët të vendosnin në pikëpyetje pjesëmarrjen në tubim.
“Pjesëmarrja është shumë e lartë, nëse marrim parasysh presionin, intimidimin, frikën për të mos marrë pjesë në protestë. Kemi pasur presion që të mos marrim pjesë në protestë. Janë njoftuar mbledhje pas mbledhje, vetëm për të penguar ardhjen në protestë. Sindikata nuk ka bërë kërkesë vetëm për pagat. Ne duam të rrisim cilësinë e mësimit dhe të përballojmë nevojat”, tha ai.
Më tej, pedagogu theksoi se po merren mungesa për studentët duke i frikësuar këta të fundit që t’i bashkohen kauzës për përmirësimin e jetës universitare.
“Presioni dhe shantazhi janë të paimagjinueshëm. Nuk kemi hallin vetëm te rritja e pagës. Të gjithë e dinë se po lëvizim për të shëndoshur universitet. Pedagogët nuk ia dalin dot me pagat. Nuk po flasim për pedagogët që kanë lidhje me ministra e pedagogë, por për pedagogët e nderuar që nuk fusin duart në xhepat e shqiptarëve”, shtoi më tej Susaj.
