Policia e Sarandë ka arritur të arrestojë pas tre ditësh kërkime, 37-vjeçarin Ermir Shabanaj, i cili pak pas mesnatës së të shtunës plagosi me thikë shtetasin Besmir Uka.
Sherri ndodhi në një lokal në lagjen Nr.3. të qytetit bregdetar, me Ukën që shkoi vetë në spital pas ngjarjes i plagosur dhe iu nënshtrua një ndërhyrje kirurgjikale.
Pavarësisht plagëve të marra ai e kishte drejtuar vetë automjetin deri në derën e spitalit, teksa shoqërohej nga një vajzë.
“Në lagjen nr.3, Sarandë, dyshohet se gjatë një konflikti për motive të dobëta, shtetasi E. Sh., 37 vjeç, ka goditur me mjet prerës (thikë) shtetasin B. U., 35 vjeç, i cili ndodhet në spital, jashtë rrezikut për jetën. Vijon puna për kapjen e autorit të dyshuar, shtetasit E. Sh., dhe sqarimin e plotë të rrethanave të ngjarjes”, njoftuan Uniformat Blu të shtunën.
Ndërkohë ditën e sotme në pranga ka rënë edhe një 42-vjeçar nga Selenica, pasi ka tentuar të fshehë Shabanajn dhe ta largojë nga qytetit i Sarandës për t’i shpëtuar prangave.
Njoftimi i policisë:
Pas një pune të mirëfilltë hetimore, nga Seksioni për Hetimin e Krimeve të Komisariatit të Policisë Sarandë, në bashkëpunim me Prokurorinë pranë Gjykatës së Rrethit Gjyqësor Sarandë, është bërë e mundur zbardhja dhe dokumentimi i plotë i ngjarjes së ndodhur më datë 21.10.2022, në lagjen nr. 3, ku mbeti i plagosur me mjet prerës, shtetasi B. U., 37 vjeç.
Si rezultat i punës hetimore, bazuar dhe në inteligjencën operative, në lagjen nr. 4, Sarandë, u bë kapja dhe arrestimi i shtetasit:
-E. Sh., 37 vjeç, banues në Sarandë, pasi dyshohet se më datë 21.10.2022, në lagjen nr. 3, Sarandë, gjatë një konflikti për motive të dobëta, ka plagosur me mjet prerës (thikë), shtetasin B. U., 37 vjeç, i cili ndodhet në spital.
Gjithashtu, nga shërbimet e Policisë është bërë edhe ndalimi i shtetasit E. M., 42 vjeç, banues në Selenicë, Vlorë, pasi dyshohet se ka ndihmuar shtetasin E. Sh., për t’u fshehur, pas ngjarjes, si dhe dyshohet se po përgatiste kushtet dhe mjetet për ta larguar atë nga qyteti i Sarandës.
Materialet iu referuan Prokurorisë pranë Gjykatës së Rrethit Gjyqësor Sarandë, për veprime të mëtejshme.
