Pedagogët zhvilluan ditën e sotme protestën kombëtare të radhës, teksa i qëndruan stoik kërkesave për rritje page dhe financim të shtuar për kërkimin shkencor, pavarësisht se qeveria është hedhur në sulm dhe vetë kryeministri Edi Rama i ka etiketuar si ish-agjentë të SHIK dhe anëtarë të “Foltores”.
Me bojkotin e auditorëve që hyn kështu në javën e dytë dhe tregon kaosin që ka përfshirë jetën universitare si pasojë e kokëfortësisë së Ramës për të mos u ulur në tryezë dhe negociuar, pedagogët nuk parashikojnë tërheqje nga kauza e tyre në afatshkurtër.
Sipas tyre, protesta do të vazhdojë me bojkotin ndaj vitit akademik edhe në ditët në vijim.
Ndër të tjera në tubim, kreu i Sindikatës së Pedagogëve, Sandër Kovaçi tha se të mërkurën në orën 11:00 do të nisë një forum, ku do të diskutohet për të ardhmen e universitetit.
“Do marrin pjesë pedagogë, studentë, gazetarë, përfaqësues të shoqërisë civile, të institucioneve, do diskutojmë dhe do dalim me një platformë që do e quajmë ‘Platforma universitare’”, tha Kovaçi.
Kovaçi shtoi se peticioni me kërkesat e paraqitura është diçka tjetër, që nuk do ketë lidhje me forumin, ndërsa vetë pedagogët kanë bërë thirrje që të merret në konsideratë letra e hapur që ata publikuan.
